ਕਾਹਦੇ ਰਿਸ਼ਤੇ ਕਾਹਦੀਆਂ ਸਾਂਝਾਂ ਰਹਿ ਗਈਆਂ ।
ਹੁਣ ਤੇ ਗੱਲਾਂ ਹੀ ਬਸ ਗੱਲਾਂ ਰਹਿ ਗਈਆਂ ।
ਸੱਜਣ ਪਰਤ ਘਰਾਂ ਨੂੰ ਟੁਰ ਗਏ ਸਾਰੇ ਈ,
ਮੇਰੇ ਨਾਲ ਸਫ਼ਰ ਵਿਚ ਰਾਹਵਾਂ ਰਹਿ ਗਈਆਂ ।
ਪਤਝੜ ਰੁੱਤ ਨੇ ਲੀੜੇ ਲਾਹ ਲਏ ਰੁੱਖਾਂ ਦੇ,
ਨੰਗਮ-ਨੰਗੀਆਂ ਹੋ ਕੇ ਸ਼ਾਖ਼ਾਂ ਰਹਿ ਗਈਆਂ ।
ਮਹਿਲਾਂ ਨੂੰ ਰੁਸ਼ਨਾਇਆ ਚੜ੍ਹਦੇ ਸੂਰਜ ਨੇ,
ਝੁੱਗੀਆਂ ਦੇ ਵਿਚ ਫਲਦੀਆਂ ਸ਼ਾਮਾਂ ਰਹਿ ਗਈਆਂ ।
ਜ਼ੁਰਮਾਂ ਵਾਲੇ ਛੁਟ ਗਏ ਓਸੇ ਵੇਲੇ ਈ,
ਹੱਥੀਂ ਬੇਦੋਸ਼ਾਂ ਹਥਕੜੀਆਂ ਰਹਿ ਗਈਆਂ ।
ਖ਼ਬਰੇ ਕਿੱਧਰ ਟੁਰ ਗਏ ਵਾਸੀ ਏਥੋਂ ਦੇ,
ਆਪਸ ਦੇ ਵਿਚ ਝੁਰਦੀਆਂ ਕੰਧਾਂ ਰਹਿ ਗਈਆਂ ।
'ਅਨਵਰ' ਅੰਨ੍ਹਾ ਜ਼ੁਲਮ ਕਮਾਇਆ ਉਸੇ ਨੇ,
ਦੰਦਾਂ ਹੇਠਾਂ, ਆਈਆਂ ਜੀਭਾਂ ਰਹਿ ਗਈਆਂ ।
