ਕਦੇ ਮਹਿਕ ਬਣ ਕੇ ਗੁਲਾਬ ਵਿਚ ਕਦੇ ਕਸ਼ਿਸ਼ ਬਣ ਕੇ ਸ਼ਬਾਬ ਵਿਚ
ਉਹ ਜਦੋਂ ਵੀ ਹੋਇਆ ਹੈ ਰੂਬਰੂ ਬਸ ਹੋਇਆ ਛੁਪ ਕੇ ਨਕਾਬ ਵਿਚ
ਓਨੇ ਜ਼ਖ਼ਮ ਨੇ ਮੇਰੇ ਕਾਲਜੇ ਓਨੇ ਫੁੱਲ ਨੇ ਰੂਹ ਦੀ ਡਾਲ 'ਤੇ
ਜਿੰਨੇ ਤੀਰ ਤਰਕਸ਼ ਵਿਚ ਤੇਰੇ ਜਿੰਨੇ ਸੁਰ ਨੇ ਤੇਰੀ ਰਬਾਬ ਵਿਚ
ਤੇਰੇ ਇਸ਼ਕ ਦਾ ਇਹ ਪਸਾਰ ਕੀ ਤੇਰੇ ਫ਼ਲਸਫ਼ੇ ਦਾ ਅਧਾਰ ਕੀ
ਆਪੇ ਬੋਟ ਵਿਚ ਖੰਭ ਤੋਲਦੈਂ ਆਪੇ ਸ਼ਿਸਤ ਲਾਈ ਉਕਾਬ ਵਿਚ
ਆਪੇ ਦਰਦ ਆਪੇ ਇਲਾਜ ਹੈਂ ਆਪੇ ਕਹਿਰ ਆਪੇ ਲਿਹਾਜ ਹੈਂ
ਇਹ ਤੂੰ ਕੈਸਾ ਖ਼ਲਕ-ਨਵਾਜ਼ ਹੈਂ ਤੇਰੀ ਗੱਲ ਨਾ ਆਉਂਦੀ ਹਿਸਾਬ ਵਿਚ
ਕਣ ਕਣ 'ਚ ਤੇਰਾ ਜਮਾਲ ਹੈ ਮੇਰਾ ਇਸ਼ਕ ਹਾਲੋਂ ਬੇਹਾਲ ਹੈ
ਤੈਨੂੰ ਕਿਸ ਜਗ੍ਹਾ ਨਾ ਮੈਂ ਢੂੰਡਿਆ ਕਦੇ ਅਗਨ ਵਿਚ ਕਦੇ ਆਬ ਵਿਚ
ਜਦ ਤੀਕ ਤੇਰੀ ਨਜ਼ਰ ਨਹੀਂ ਇਹਨਾਂ ਨੁਸਖ਼ਿਆਂ 'ਚ ਅਸਰ ਨਹੀਂ
ਇਹ ਤਾਂ ਦਰਦ ਤੇਰੇ ਵਿਯੋਗ ਦਾ ਕੀ ਇਲਾਜ ਭਾਲਾਂ ਕਿਤਾਬ ਵਿਚ
ਜਦ ਆਈ ਸਮਝ ਅਖ਼ੀਰ ਨੂੰ ਇਸ ਕਮਲੇ ਦਿਲ ਦਿਲਗੀਰ ਨੂੰ
ਤੇਰਾ ਪਿਆਰ ਮਿਲਿਆ ਰਬਾਬ 'ਚੋਂ ਤੇਰਾ ਦਰਸ ਹੋਇਆ ਗੁਲਾਬ ਵਿਚ
