ਕਾਹਨੂੰ ਦਿਲ ਵਿਚ ਦਰਦ ਵਸਾਇਆ ਪੁੱਛਾਂਗੇ ।
ਜੇ ਉਹ ਜ਼ਾਲਮ ਪਰਤ ਕੇ ਆਇਆ ਪੁੱਛਾਂਗੇ ।
ਕਿਹੜਾ ਜਾਨ ਤਲੀ ਤੇ ਲੈ ਕੇ ਟੁਰਿਆ ਸੀ,
ਮੰਜ਼ਿਲ ਕਿਸ ਨੂੰ ਸੀਨੇ ਲਾਇਆ ਪੁੱਛਾਂਗੇ ।
ਭੁੱਖ ਦੀ ਦੌਲਤ ਵੰਡੀ ਕੀਹਨੇ ਚਾਰ-ਚੁਫ਼ੇਰ,
ਕੀਹਨੇ ਆਪਣਾ ਆਪ ਰਜਾਇਆ ਪੁੱਛਾਂਗੇ ।
ਜਿਸ ਵੇਲੇ ਸੀ ਨ੍ਹੇਰਾ ਸਾਡੇ ਆਲ-ਦੁਆਲ,
ਕਿੱਥੇ ਸੀ ਉਸ ਵੇਲੇ ਸਾਇਆ ਪੁੱਛਾਂਗੇ ।
ਕੀਹਨੇ ਪਹਿਰੇ ਲਾਏ ਸਭ ਦੀਆਂ ਸੋਚਾਂ ਤੇ,
ਕੀਹਨੇ ਹੋਠਾਂ ਨੂੰ ਪਥਰਾਇਆ ਪੁੱਛਾਂਗੇ ।
'ਸ਼ਾਹਿਦ' ਕਿਉਂ ਨਹੀਂ ਦਿੱਤਾ ਧੀ ਨੂੰ ਭਰਵਾਂ ਦਾਜ,
ਕਿਉਂ ਨਹੀਂ ਆਪਣਾ ਫ਼ਰਜ਼ ਨਿਭਾਇਆ ਪੁੱਛਾਂਗੇ ।
