ਕੱਲ੍ਹ ਨੂੰ ਕਿਧਰੇ ਦੋਹਾਂ ਪੜ੍ਹ ਪੁੜ੍ਹ ਜਾਣਾ ਏ
ਤੂੰ ਕਿਧਰੇ ਮੈਂ ਕਿਧਰੇ ਖੜ੍ਹ ਖੁੜ੍ਹ ਜਾਣਾ ਏ
ਮੈਨੂੰ ਕੋਹ ਕਾਹ ਦੇਣਾ ਅੰਤ ਰਿਵਾਜਾਂ ਨੇ
ਤੂੰ ਰਸਮਾਂ ਦੀ ਸੂਲ਼ੀ ਚੜ੍ਹ ਚੁੜ੍ਹ ਜਾਣਾ ਏ
ਕੁਝ ਵੀ ਕਰੀਏ ਭੁੱਖ ਤੇ ਰੱਜ ਦੇ ਨਾਗਾਂ ’ਚੋਂ
ਇੱਕ ਤੈਨੂੰ ਇੱਕ ਮੈਨੂੰ ਲੜ ਲੁੜ ਜਾਣਾ ਏ
ਹੌਲ਼ੀ ਹੌਲ਼ੀ ਤੇਰੇ ਪਿੰਡ ਤੇ ਪਿੱਪਲਾਂ ਤੋਂ
ਸਾਡੇ ਨਾਂ ਦੇ ਪੱਤਰਾਂ ਝੜ ਝੁੜ ਜਾਣਾ ਏ
ਉੱਡ ਉੱਡਾ ਕੇ ਓੜਕ ਚਿੜੀਆਂ ਚੁੜੀਆਂ ਨੇ
ਆਪੋ ਆਪਣੇ ਪਿੰਜਰੇ ਤੜ ਤੁੜ ਜਾਣਾ ਏ
ਜਿੰਨੇ ਚਿਰ ਨੂੰ ਵੇਲ਼ਾ ਨਾਲ਼ ਖਲੋਵੇਗਾ
ਓਨੇ ਚਿਰ ਨੂੰ ਲੇਖਾਂ ਅੜ ਉੜ ਜਾਣਾ ਏ
ਕਈ ਗੱਲਾਂ ਨਈਂ ਪਚਣਾ ‘ਸੰਧੂ’ ਕਈਆਂ ਨੂੰ
ਕਈ ਗੱਲਾਂ ਤੋਂ ਕਈਆਂ ਸੜ ਸੁੜ ਜਾਣਾ ਏ
