ਕਾਲੀਆਂ ਰਾਤਾਂ 'ਚ ਜੁਗਨੂੰ ਚਮਕਦੇ ਰਹੇ ਦੇਰ ਤਕ।
ਯਾਦ ਤੇਰੀ ਦੇ ਸ਼ਗ਼ੂਫੇ ਮਹਿਕਦੇ ਰਹੇ ਦੇਰ ਤਕ।
ਸੌਂ ਗਈ ਕਾਇਨਾਤ ਸਾਰੀ ਚੰਨ ਤਾਰੇ ਸੌਂ ਗਏ
ਘੁੰਗਰੂ ਬਿਰਹਣ ਦੇ ਪੈਰੀਂ ਸਿਸਕਦੇ ਰਹੇ ਦੇਰ ਤਕ ।
ਹੰਝੂਆਂ ਵਿਚ ਗ਼ਮ ਸਮਾ ਕੇ ਕਤਰਿਆਂ ਸੰਗ ਵਹਿ ਤੁਰੇ
ਟੁੱਟ ਕੇ ਪਰ ਖ਼ਾਬ ਨੈਣੀਂ ਰੜਕਦੇ ਰਹੇ ਦੇਰ ਤਕ ।
ਆਖ ਕੇ ਉਹ ਅਲਵਿਦਾ ਅੱਖਾਂ ਤੋਂ ਓਝਲ ਹੋ ਗਿਆ
ਸੁਰ ਉਹ ਦੇ ਖਾਮੋਸ਼ੀਆਂ ਨੂੰ ਚੀਰਦੇ ਰਹੇ ਦੇਰ ਤਕ।
ਖੁਸ਼ਨੁਮਾ ਰੰਗਾਂ ਦਾ ਮੌਸਮ ਸਿਰਫ ਰੁਕਿਆ ਦੋ ਘੜੀ
ਪਤਝੜਾਂ ਦੇ ਕਾਫਲੇ ਤਾਂ ਆਂਵਦੇ ਰਹੇ ਦੇਰ ਤਕ ।
