ਕਲਪਨਾ ਦੇ ਘਰ ਚ ਤੇਰਾ ਨਾਮ ਹੀ ।
ਗੂੰਜਦਾ ਰਹਿੰਦਾ ਸਵੇਰੇ ਸ਼ਾਮ ਹੀ ।
ਨਾਮ ਤੇਰੇ ਤੇ ਬਣਾਏ ਕਾਫੀਏ,
ਤੇ ਗ਼ਜ਼ਲ ਤੈਨੂੰ ਕਰੇ ਪਰਨਾਮ ਹੀ ।
ਤੇਰਿਆਂ ਖਾਬਾਂ ਚ ਆਉਣਾ ਖਾਸ ਬਣ,
ਮੈਂ ਨਹੀਂ ਰਹਿਣਾ ਸਦਾ ਲਈ ਆਮ ਹੀ ।
ਮੈਂ ਕਿਓਂ ਮੈਅਖਾਨਿਆਂ ਵਿਚ ਭਟਕਣਾ,
ਤੇਰਿਆਂ ਨੈਣਾਂ ਚੋਂ ਮਿਲ ਗਏ ਜਾਮ ਹੀ ।
ਮੈਂ ਮੁਸਾਫ਼ਿਰ ਚੱਲ ਆਇਆ ਦੂਰ ਤੋਂ,
ਚੰਦ ਘੜੀਆਂ ਕਰ ਲਵਾਂ ਆਰਾਮ ਹੀ ?
ਲੋਕ ਆਖਣਗੇ ਸ਼ਰਾਬੀ ਮੰਨਿਆ,
ਸਾਕੀਆ ਤੂੰ ਵੀ ਧਰੇਂ ਇਲਜ਼ਾਮ ਹੀ ।
ਮੇਰਿਆਂ ਹੋਠਾਂ ਨੂੰ ਵਿਸਰੇ ਗੀਤ ਨੇ,
ਮੂੰਹ ਤੇ ਚੜਿਆ ਬੱਸ ਤੇਰਾ ਨਾਮ ਹੀ ।
