ਕਵਿਤਾ ਜਨਨੀ ਕਵੀ ਦੀ
ਕਦੇ ਹਕੀਕਤ ਵਿਚ
ਕਦੇ ਖਿਆਲਾਂ ਵਿਚ
ਕਦੇ ਬੁਝਾਰਤਾਂ ਵਿਚ
ਤੇ ਕਦੇ ਸਵਾਲਾਂ ਵਿਚ ।
ਕਵਿਤਾ ਜਨਨੀ ਕਵੀ ਦੀ
ਕੁਝ ਦੁੱਖ ਕਹੇ
ਕੁਝ ਜ਼ਜਬਾਤ ਕਹੇ
ਕੁਝ ਆਮ ਕਹੇ
ਕੁਝ ਖਾਸ ਕਹੇ ।
ਕਵਿਤਾ ਜਨਨੀ ਕਵੀ ਦੀ
ਸੰਦੇਸ਼ ਭਰੀ
ਉਪਦੇਸ਼ ਭਰੀ
ਕਿਤੇ ਸੋਚ ਕਵੀ ਦੀ
ਡਰੀ ਡਰੀ ।
ਕਵਿਤਾ ਜਨਨੀ ਕਵੀ ਦੀ
ਕਿਤੇ ਖ਼ਾਬਾਂ ਵਿਚ
ਕਿਤੇ ਖਿਆਲਾਂ ਵਿਚ
ਖ਼ਲਕ ਦੇ ਸਵਾਲਾਂ ਵਿਚ
ਰਾਜਨੀਤੀ ਦੀਆਂ ਚਾਲਾਂ ਵਿਚ ।
ਕਵਿਤਾ ਜਨਨੀ ਕਵੀ ਦੀ
ਕਿਤੇ ਸੱਚ ਬੋਲੇ
ਕਿਤੇ ਝੂੱਠ ਬੋਲੇ
ਕਿਤੇ ਇਸ਼ਕ ਤੋਲੇ
ਕਿਤੇ ਭੇਦ ਖੋਲ੍ਹੇ ।
ਕਵਿਤਾ ਜਨਨੀ ਕਵੀ ਦੀ
ਕੁਝ ਹੱਡ ਬੀਤੀ
ਕੁਝ ਜੱਗ ਬੀਤੀ
ਕਿਤੇ ਗੰਢ ਸੀਤੀ
ਕਿਤੇ ਸੋਚ ਕੀਤੀ ।
ਕਵਿਤਾ ਜਨਨੀ ਕਵੀ ਦੀ
ਕਿਤੇ ਇਸ਼ਕ ਤੇ ਕਿਤੇ ਪਿਆਰ
ਕਿਤੇ ਜਿੱਤ ਤੇ ਕਿਤੇ ਹਾਰ
ਕਿਤੇ ਹੁਸਨ ਤੇ ਕਿਤੇ ਬਹਾਰ
ਕਿਤੇ ਵਕਤ ਦੀ ਭੈੜੀ ਮਾਰ ।
ਕਵਿਤਾ ਜਨਨੀ ਕਵੀ ਦੀ
ਕੁਝ ਚੰਗੀ ਜਿਹੀ
ਕੁਝ ਮੰਦੀ ਜਿਹੀ
ਕੁਝ ਕੁਝ ਔਖੀ ਜਿਹੀ
ਕੁਝ ਕੁਝ ਸੌਖੀ ਜਿਹੀ ।
ਕਵਿਤਾ ਜਨਨੀ ਕਵੀ ਦੀ
ਜੇ ਲਿਖੋ ਤਾਂ ਕਵਿਤਾ ਬਣਦੀ ਏ
ਨਾ ਲਿਖੋ ਤਾਂ ਸੋਚ ਮਨ ਦੀ ਏ ।
