ਤੇਰਾ ਮੇਰਾ
ਕੀ ਹੈ ਰਿਸ਼ਤਾ
ਮੈਨੂੰ ਕੁਝ ਪਤਾ ਨਹੀਂ ਲਗਦਾ
ਪਰ ਤੇਰੇ ਬਿਨ
ਇਹ ਭਖਦਾ ਸੂਰਜ
ਤੇ ਜੱਗ ਸਾਰਾ
ਸੁੰਨ੍ਹਾ ਮੜੀ ਮਸਾਣ ਹੈ ਲਗਦਾ
ਮੈਨੂੰ ਮੇਰਾ ਸਾਰਾ ਆਪਾ
ਜ਼ੰਜੀਰਾਂ ਦੇ ਵਿਚ ਕਸਿਆ
ਮੇਰਾ ਸਭ ਕੁਝ
ਮੇਰੇ ਕੋਲੋਂ ਖੁੱਸਿਆ ਲਗਦਾ
ਪਰ ਜਦ ਕਿਧਰੇਂ
ਤੂੰ ਆ ਜਾਵੇਂ
ਪੈਲਾਂ ਪਾਵੇਂ
ਗੁਣ ਗੁਣਾਵੇਂ
ਭਰ ਕੇ ਲੱਪ ਸੱਜਰੇ ਸ਼ਬਦਾਂ ਦੀ
ਮੇਰੀ ਖਾਲੀ ਝੋਲੀ ਪਾਵੇਂ
ਸੁੱਤੀ ਮੇਰੀ ਸੋਚ ਜਗਾਵੇਂ
ਸੋਚ ਮੇਰੀ ਫਿਰ
ਸ਼ਬਦਾਂ ਦੇ ਖੰਭਾਂ ਤੇ ਚੜ੍ਹ ਕੇ
ਬ੍ਰਹਿਮੰਡ ਦੀ ਉਹ ਸੈਰ ਤੇ ਜਾਵੇ ।
ਮੈਨੂੰ ਮੇਰਾ ਸਾਰਾ ਆਪਾ
ਚੰਗਾ ਅਤੇ ਆਜ਼ਾਦ ਹੈ ਲਗਦਾ
ਤੇ ਇਹ ਸੂਰਜ ਸੋਮਾ ਚਾਨਣ
ਤੇ ਜੱਗ ਸਾਰਾ
ਵਸਿਆ ਅਤੇ ਆਬਾਦ ਹੈ ਲਗਦਾ ।
