ਤੁਹਾਡੀ ਵਰਚੱਸਵ ਦੀ ਲੜਾਈ
ਹਮੇਸ਼ਾ ਸਾਡੀ ਰੋਟੀ ਦੀ ਲੜਾਈ 'ਤੇ ਭਾਰੂ ਪੈਂਦੀ ਹੈ।
ਸਿਆਸੀ ਜੋਗ ਦਾ ਜੋਤਾ
ਸਾਡੀ ਕਰਮਸ਼ੀਲ ਲੋਕਾਂ ਦੀ ਕਰਮਭੂਮੀ ਨੂੰ ਥੇਹ ਬਣਾ ਦਿੰਦਾ ।
ਤੁਸੀਂ ਹਮੇਸ਼ਾ ਧਰਵਾਸ ਦੀ ਐਗਜੀਬੀਸ਼ਨ ਲਗਾਉਂਦੇ ਹੋ
ਅਸੀਂ ਹਮੇਸ਼ਾ ਸ਼ਿਰਕਤ ਕਰਦੇ ਹਾਂ।
ਤੁਹਾਡੇ ਆਪਣੇ ਹੀ ਤਰ੍ਹਾਂ ਦੇ ਵਿਵੇਕ ਅੰਦਰ
ਅਸੀਂ ਕਦੇ ਮਹਿਫੂਜ਼ ਨਹੀਂ ਹੋਏ ।
ਤੁਸੀਂ ਹਮੇਸ਼ਾ ਚਾਹਿਆ ਕਿ
ਸਾਡੇ ਨਜ਼ਰੀਏ ਨੂੰ ਮੋਤੀਆ ਮਾਰ ਜਾਵੇ
ਅਤੇ ਸੋਚ ਨੂੰ ਲਕਵਾ ।
ਤਵਾਰੀਖ਼ ਗਵਾਹ ਹੈ
ਤੁਹਾਡੀ ਮਸ਼ਕ ਦੇ ਕਾਇਰਾਨਾ ਵਤੀਰੇ
ਅਤੇ ਸਾਡੇ ਬਾਗ਼ੀਆਨਾ ਮਿਜਾਜ਼ ਬਾਰੇ ।
ਅਸੀਂ ਬੋਲਦੇ ਬੋਲਦੇ ਥੱਕ ਸਕਦੇ ਹਾਂ
ਪਰ ਖ਼ਾਮੋਸ਼ ਨਹੀਂ ਹੋ ਸਕਦੇ।
ਜੇਕਰ ਤੁਹਾਡਾ ਲੋਹਾ ਬੋਲੇਗਾ
ਤਾਂ ਸਾਡਾ ਲਹੂ ਬੋਲੇਗਾ।
