ਖ਼ੇ-ਖ਼ੂਬੀ ਯਾਰ ਦੀ ਰੰਗਾ ਰੰਗ
ਇਹਨਾਂ ਖੂਬਾਂ ਦੇ ਤਨ ਰੰਗ ਨਹੀਂ ।
ਓਸੇ ਛਣ ਛਣ ਚੂੜੇ ਸੁਨਹਰੀ ਦੀ
ਹੱਥ ਉਨ੍ਹਾਂ ਦੇ ਹਿਕ ਵੰਗ ਨਹੀਂ ।
ਬਾਜ਼ੂ ਬਾਜ਼ੂਬੰਦ ਕੀਤੇ ਬਾਂਹ ਦਿੱਤੀ
ਨੱਕ ਹਥੀਂ ਬਿਨ ਤੰਗ ਨਹੀਂ ।
ਮੈਨੂੰ ਤਖਤ ਹਜ਼ਾਰੇ ਗਾਰੇ ਤਖਤੀ
ਰੰਗਪੁਰ ਦਾ ਹਿਕ ਅੰਗ ਨਹੀਂ ।
ਇਹ ਮਾਲਾ ਕੀ ਮਾਲਾ ਖੋਹ ਘੱਤਾਂ
ਮੈਨੂੰ ਖੇੜਿਆਂ ਦਾ ਵਤ ਸੰਗ ਨਹੀਂ ।
ਮੈਂ ਵੈਸਾਂ ਜੁਮੇ ਦੇ ਮੇਲੇ
ਮਿਲਸਾਂ ਯਾਰ ਨੂੰ ਓਥੇ ਸੰਗ ਨਹੀਂ ।
ਜੇ ਵਤ ਸੰਗਾਂ ਖਲਵਤ ਮੰਗਾਂ
ਕਿਉਂ ਮੀਆਂ ਨਿਜ਼ਾਮ ਦਾ ਝੰਗ ਨਹੀਂ ।
ਓਥੇ ਗੁਰੂ ਚਬੂਤਰਾ ਹਾਕਮ ਦੀ ਜਾਉ
ਰਹ ਵੇ ਨੀਂਗਰਾ ਝੰਗ ਨਹੀਂ ।
ਰਹ ਵੇ ਹੈਦਰ ਛੱਡ ਇਹ ਗੱਲੀਂ
ਜੇ ਤੂੰ ਪੀਤੀ ਭੰਗ ਨਹੀਂ ।੧।
