ਜਦ ਤਕ ਪੰਜ ਦਰਿਆ ਨਾ ਥੰਮਣ,
ਵਗਦਾ ਰਹੇ ਤੇਰਾ ਖੂਹ ਮਿੱਤਰਾ ।
ਵਧੇ ਫੁੱਲੇ ਤੇ ਜੁਆਨੀ ਮਾਣੇ,
ਖੁਸ਼ ਹੀ ਰਹੇ ਤੇਰੀ ਰੂਹ ਮਿੱਤਰਾ ।
ਜੀਵੇ ਤੇਰੀ ਭਾਰਤ ਮਾਤਾ,
ਜਿਸਦਾ ਤੂੰ ਰਖਵਾਲਾ ਏਂ ।
ਜੀਵੇ ਤੇਰੀ ਅੱਲੜ੍ਹ ਜੱਟੀ,
ਜਿਸਦਾ ਤੂੰ ਮਤਵਾਲਾ ਏਂ ।
ਜੀਵਣ ਤੇਰੇ ਲੋਕ ਗੀਤ,
ਜੋ ਪਾਉਣ ਕਲੇਜੇ ਧੂਹ ਮਿੱਤਰਾ ।
ਜਦ ਤਕ ਪੰਜ ਦਰਿਆ ਨਾ ਥੰਮਣ...
ਜੱਗ ਦੀ ਜ਼ੁਲਫ਼ ਸੰਵਾਰਨ ਵਾਲੇ,
ਉਲਝੇ ਨਾ ਤਕਦੀਰ ਤੇਰੀ ।
ਬੇਲੇ ਦੇ ਵਿਚ ਚੁੰਗੀਆਂ ਭਰਦੀ,
ਮਿਲ ਜੇ ਜੱਟੀ ਹੀਰ ਤੇਰੀ ।
ਖਿੜੀ ਰਹੇ ਤੇਰੀ ਕੇਸਰ ਕਿਆਰੀ,
ਮਹਿਕਦੀ ਰਹੇ ਤੇਰੀ ਰੂਹ ਮਿੱਤਰਾ,
ਜਦ ਤਕ ਪੰਜ ਦਰਿਆ ਨਾ ਥੰਮਣ...
ਹੀਰੇ ਭਗਤ ਸਿੰਘ, ਸਰਾਭੇ ਵਾਂਗੂੰ,
ਦੇਸ਼ ਦੀ ਸੇਵਾ ਕਰਦਾ ਰਹੇਂ ।
ਅਣਖ ਆਬਰੂ ਇੱਜ਼ਤ ਖ਼ਾਤਰ,
ਜਾਨ ਤਲੀ ਤੇ ਧਰਦਾ ਰਹੇਂ ।
ਤੇਰੇ ਬਾਗ਼ਾਂ ਵਿਚ ਆਜ਼ਾਦੀ
ਕਰਦੀ ਰਹੇ ਕੂ ਕੂ ਮਿੱਤਰਾ,
ਜਦ ਤਕ ਪੰਜ ਦਰਿਆ ਨਾ ਥੰਮਣ...
ਓ ਦੁਨੀਆਂ ਦੇ ਅੰਨ ਦਾਤੇ,
ਜੇ ਆਪਣਾ ਆਪ ਪਛਾਣੇਂ ਤੂੰ ।
ਇਹ ਜੀਵਨ ਦੀਆਂ ਉੱਚੀਆਂ ਸੁੱਚੀਆਂ,
...............................
ਜਦ ਤਕ ਪੰਜ ਦਰਿਆ ਨਾ ਥੰਮਣ...
ਖੂਹ ਦੀਆਂ ਟਿੰਡਾਂ ਵਿਚੋਂ ਪਾਣੀ,
ਅੰਮ੍ਰਿਤ ਬਣ ਕੇ ਡੁੱਲ੍ਹੇਗਾ ।
ਇਕ ਹੰਭਲਾ ਹੋਰ ਜੇ ਮਾਰੇਂ,
ਸੰਨ ਸੰਤਾਲੀ ਭੁੱਲੇਂਗਾ ।
ਫੇਰ ਉਦਾਸੀ ਲਿਖ ਦੇਵੇ,
ਤੂੰ ਲਵੇਂ ਸਵਰਗ ਨੂੰ ਛੂਹ ਮਿੱਤਰਾ,
ਜਦ ਤਕ ਪੰਜ ਦਰਿਆ ਨਾ ਥੰਮਣ,
ਵਗਦਾ ਰਹੇ ਤੇਰਾ ਖੂਹ ਮਿੱਤਰਾ ।
