ਜੰਗਲ-ਬੇਲੇ, ਮਹਿਲ-ਮੁਨਾਰੇ, ਮੰਦਰ-ਮਸੀਤਾਂ ਵਿੱਚ,
ਬਹੁਤ ਭਾਲਿਆ ਤੈਨੂੰ ਪਰ ਤੂੰ ਕਿਧਰੇ ਵੀ ਮਿਲਦਾ ਨਹੀਂ।
ਚੰਗੇ-ਮੰਦੇ ਕੰਮ ਤੇਰੇ, ਸਭ ਸ੍ਰਿਸ਼ਟੀ ਦਾ ਮਾਲਿਕ ਤੂੰ,
ਲੋਕ ਕਹਿੰਦੇ ਤੇਰੇ ਤੋਂ ਬਿਨਾਂ ਕੋਈ ਪੱਤਾ ਵੀ ਹਿਲਦਾ ਨਹੀਂ।
ਤੇਰੇ ਨਾਮ ਤੇ ਦੰਗੇ ਹੁੰਦੇ, ਨਿੱਤ ਮਰਦੇ-ਮਾਰਦੇ ਮਾਸੂਮ ਲੋਕ,
ਐਨੇ ਦਰਦ ਦੇ ਕੇ ਵੀ ਤੇਰਾ ਕਲੇਜਾ ਪਿਘਲਦਾ ਨਹੀਂ।
ਪਲ-ਪਲ ਖੋਜ ਕਰੇ ਤੇਰੀ, ਤੇਰੇ ਬਾਰੇ ਹੀ ਸੋਚਦਾ ਏ,
ਕਿਸੇ ਵੈਦ ਕੋਲ ਇਲਾਜ ਮੇਰੇ ਪਾਗਲ ਦਿਲ ਦਾ ਨਹੀਂ।
ਕੌਣ ਹੈਂ, ਕਿੱਥੋਂ ਆਇਐਂ, ਤੇ ਕੀਹਨੇ ਬਣਾਇਆ ਤੈਨੂੰ?
ਸਿੱਧੂ' ਕੋਈ ਹੱਲ ਇਸ ਸਵਾਲ ਮੁਸਕਿਲ ਦਾ ਨਹੀਂ।
