ਕੀ ਹੋਇਆ ਜੇਕਰ ਸਮਿਆਂ ਦੇ ਮਾਰੇ ਹਾਂ ।
ਟੁੱਟੇ ਹਾਂ ਫਿਰ ਵੀ ਅੰਬਰ ਦੇ ਤਾਰੇ ਹਾਂ।
ਕਾਲੀ ਰਾਤ 'ਚ ਆਪਾਂ ਹੋਰ ਚਮਕ ਪੈਂਦੇ
ਦੀਪਕ, ਜੁਗਨੂੰ, ਸੁਪਨੇ, ਚੰਨ, ਸਿਤਾਰੇ ਹਾਂ ।
ਦਿਉਦਾਰਾਂ ਦੇ ਵਾਂਗਰ ਹੋਂਦ ਅਸਾਡੀ ਹੈ
ਬਿਰਖਾਂ ਵਾਂਗਰ ਉੱਗੇ ਝੀਲ ਕਿਨਾਰੇ ਹਾਂ ।
ਖੂਬ ਸਮਝਦੇ ਹਾਂ ਪੌਣਾਂ ਦੀ ਸਾਜ਼ਿਸ਼ ਨੂੰ
ਡਟ ਜਾਵਾਂਗੇ ਪਰਬਤ ਨਾਲੋਂ ਭਾਰੇ ਹਾਂ ।
ਸਾਡੇ ਵਾਅਦੇ ਪੱਥਰ ਉੱਤੇ ਲੀਕ ਜਿਹੇ
ਐਵੇਂ ਸੋਚ ਨ ਬੈਠੀਂ ਬੇਇਤਬਾਰੇ ਹਾਂ ।
ਜਿਤ ਸਕਦੇ ਸੀ ਅੰਬਰ, ਏਨੀ ਹਿੰਮਤ ਹੈ
ਤੂੰ ਜਿਤ ਜਾਵੇਂ ਤੇਰੀ ਖਾਤਿਰ ਹਾਰੇ ਹਾਂ।
ਤੇਰੇ 'ਤੇ ਨਾ ਆ ਜਾਵੇ ਇਲਜ਼ਾਮ ਕਿਤੇ
ਏਸੇ ਲਈ ਤਾਂ ਰਾਜ਼ ਛੁਪਾਉਂਦੇ ਸਾਰੇ ਹਾਂ ।
