ਕਿਉਂ ਕਾਗ ਬਨੇਰੇ ਤੇ ਬੋਲੇ ।
ਕੋਈ ਦੱਸੇ ਇਹ ਕੀ ਆਂਹਦਾ ਏ ।
ਕਿਉਂ ਹੋਰ ਕਿਤੇ ਨਾ ਜਾਂਦਾ ਏ ।
ਕਿਉਂ ਐਵੇਂ ਕਾਂ ਕਾਂ ਕਰਦਾ ਏ ।
ਸਿਰ ਮੇਰੇ ਇਹ ਝੂਠੇ ਧਰਦਾ ਏ ।
ਨਹੀਂ ਉੱਡਦਾ ਪਿਆ ਉਡਾਇਆਂ ਵੀ ।
ਪਿਆ ਭੁੱਲੇ ਰਾਹੇ ਪਾਇਆਂ ਵੀ ।
ਇਸ ਵਿਹੜੇ ਕਿਨ੍ਹੇ ਆਣਾ ਏਂ ।
ਕਿਸੇ ਏਥੇ ਫੇਰਾ ਪਾਣਾ ਏਂ ।
ਤੂੰ ਕਾਵਾਂ ਕਾਂ ਕਾਂ ਕਰ ਕੇ ।
ਪਿਆ ਐਵੇਂ ਜੀ ਤਰਸਾਨਾ ਏਂ ।
ਨਾ ਬੈਠ ਤੂੰ ਏਸ ਬਨੇਰੇ ਤੇ ।
ਕਿਸੇ ਹੋਰ ਦੇ ਕੋਠੇ ਬਹਿ ਜਾ ਕੇ ।
ਕਰ ਨੇਕੀ ਇਹ ਇਕ ਮੇਰੇ ਤੇ ।
ਕਿਸੇ ਹੋਰ ਨੂੰ ਕਹਿਣੀਆਂ ਕਹਿ ਜਾ ਕੇ ।
ਮੇਰਾ ਜੀ ਨਮਾਣਾ ਮੁੜ ਡੋਲੇ ।
ਕਿਉਂ ਕਾਗ ਬਨੇਰੇ ਤੇ ਬੋਲੇ ।
