ਉੱਠੋ ਉੱਠੋ ਉੱਠੋ,
ਕਿ ਉੱਠੋ ਕੁਝ ਕਰਨਾ ਹੈ,
ਕਿਰਤੀ ਲੋਕੋ ਖੁੱਲ ਕੇ ਜਿਉਣ ਲਈ,
ਤੁਸਾਂ ਨੇ ਥੋੜਾ ਥੋੜਾ ਮਰਨਾ ਹੈ।
ਸੋਚੋ ਸੋਚੋ ਸੋਚੋ,
ਕੁਝ ਸੋਚੋ ਤੇ ਵਿਚਾਰ ਕਰੋ,
ਕਿਸਮਤ, ਰੱਬ, ਸਬਰ ਨੂੰ ਛੱਡੋ,
ਇਨਕਲਾਬੀ ਰਾਹ ਅਖਤਿਆਰ ਕਰੋ।
ਜੁੜੋ ਜੁੜੋ ਜੁੜੋ,
ਜੁੜੋ ਤੇ ਇਨਕਲਾਬੀ ਨਾਹਰੇ ਲਾਉ,
'ਕੱਲੇ-ਕੱਲੇ ਦਾ ਜੋਰ ਨਹੀਂ ਪੁੱਗਣਾ,
ਕਿਰਤੀ ਲੋਕੋ ਇੱਕਜੁੱਟ ਹੋ ਜਾਉ।
ਤੁਰੋ ਤੁਰੋ ਤੁਰੋ,
ਕਿ ਤੁਰਕੇ ਹੀ ਅੱਗੇ ਜਾਵੋਗੇ,
ਹੱਥ ਤੇ ਹੱਥ ਧਰ ਬੈਠੇ ਰਹੇ ਜੇ,
ਦੂਰ ਖਲੋਤੀ ਮੰਜ਼ਿਲ ਕਿਵੇਂ ਪਾਵੋਗੇ।
ਮਾਰੋ ਮਾਰੋ ਮਾਰੋ,
ਪੂੰਜੀਵਾਦੀ ਸੋਚ ਨੂੰ ਮਾਰ ਧਰੋ,
ਨਾਬਰਾਬਰੀ ਨੂੰ ਜੜੋਂ ਪੱਟ ਸੁੱਟੋ,
ਭਗਤ ਸਿੰਘ ਦਾ ਸੁਪਨਾ ਸਾਕਾਰ ਕਰੋ।
