ਕਿਸੇ ਕਾਲੀ ਘਟਾ ਨੇ ਜਦ ਕਿਤੇ ਸੂਰਜ ਲੁਕਾਇਆ ਸੀ ।
ਮੈਂ ਦੱਸਾਂ ਕਿਸ ਤਰਾਂ ਤੈਨੂੰ ਤੂੰ ਕਿੰਨਾ ਯਾਦ ਆਇਆ ਸੀ ।
ਸਿਤਾਰੇ ਗਿਣਦਿਆਂ ਹੋਇਆਂ ਗੁਜ਼ਾਰੀ ਰੈਣ ਅੱਖਾਂ ਵਿੱਚ
ਤੇ ਆਪਾ ਦੱਸ ਨਹੀਂ ਸਕਦੇ ਕਿਵੇਂ ਫਿਰ ਦਿਨ ਬਿਤਾਇਆ ਸੀ ।
ਬੁਲਾ ਕੇ ਬਜ਼ਮ ਆਪਣੀ ਵਿੱਚ ਬਿਠਾਇਆ ਨਾਲ ਗ਼ੈਰਾਂ ਦੇ
ਮੇਰੇ ਦਿਲਬਰ ਜਰਾ ਦੱਸੀਂ ਤੂੰ ਮੈਨੂੰ ਕਿਉਂ ਰੁਵਾਇਆ ਸੀ ।
ਤੇਰੇ ਤੁਰ ਜਾਣ ਦਾ ਮੈਨੂੰ ਓਹ ਮੰਜ਼ਰ ਯਾਦ ਆਉਂਦਾ ਏ
ਜਦੋਂ ਤੂੰ ਅਲਵਿਦਾ ਕਹਿ ਕੇ ਹਵਾ ਵਿੱਚ ਹੱਥ ਹਿਲਾਇਆ ਸੀ ।
ਅਜਬ ਜਾਦੂਗਰੀ ਤੇਰੀ ਮੇਰੇ ਹਮਰਾਜ਼ ਐ ਮਹਿਰਮ
ਮੇਰੇ ਨੈਣਾਂ ਨੂੰ ਦੇ ਕੇ ਖ਼ਾਬ ਮੈਨੂੰ ਕਿਉਂ ਜਗਾਇਆ ਸੀ ।
ਗਜ਼ਲ ਕਹਿੰਦਾ ਕੋਈ ਇਸ ਨੂੰ ਕਿਸੇ ਨੇ ਗੀਤ ਕਹਿ ਦਿੱਤਾ
ਬੇਗਾਨੇ ਬੋਲ ਲੈ ਕੇ ਮੈਂ ਜਦੋਂ ਇਕ ਸੁਰ ਸਜਾਇਆ ਸੀ ।
