ਕਿੱਥੇ ਗਈਆਂ ਖ਼ੁਸ਼ੀਆਂ ਮੇਰੇ ਸ਼ਹਿਰ ਦੀਆਂ ।
ਉੱਡੀਆਂ ਉੱਡੀਆਂ ਵਸਤਾਂ ਮੇਰੇ ਸ਼ਹਿਰ ਦੀਆਂ ।
ਜਦ ਦਾ ਉਹ ਪਰਦੇਸੀ ਏਥੋਂ ਤੁਰਿਆ ਏ,
ਲੈ ਗਿਆ ਨਾਲ ਬਹਾਰਾਂ ਮੇਰੇ ਸ਼ਹਿਰ ਦੀਆਂ
ਖ਼ਬਰੈ ਕਿਹੜੇ ਖ਼ੌਫ਼ ਨੇ ਤੰਬੂ ਤਾਣੇ ਨੇ,
ਸੁੰਨੀਆਂ ਦਿੱਸਣ ਗਲੀਆਂ ਮੇਰੇ ਸ਼ਹਿਰ ਦੀਆਂ ।
ਦਾਜ ਦੀ ਲਾਅਨਤ ਪਾਰੋਂ ਡੋਲੇ ਉੱਠਦੇ ਨਹੀਂ,
ਪੁੱਠੀਆਂ ਸਿੱਧੀਆਂ ਰੀਤਾਂ ਮੇਰੇ ਸ਼ਹਿਰ ਦੀਆਂ ।
ਲੱਗਦੈ ਮਾਹੀ ਵਿਹੜੇ ਫੇਰਾ ਪਾਇਆ ਏ,
ਹੋਈਆਂ ਮਸਤ ਫ਼ਿਜ਼ਾਵਾਂ ਮੇਰੇ ਸ਼ਹਿਰ ਦੀਆਂ ।
ਖ਼ਬਰੈ ਕਿਸ ਨੇ ਨਫ਼ਰਤ ਦੇ ਬੀ ਬੋਏ ਨੇ,
ਲਹੂ ਥੀਂ ਰੰਗੀਆਂ ਕੰਧਾਂ ਮੇਰੇ ਸ਼ਹਿਰ ਦੀਆਂ ।
ਸਭ ਦੀ ਮੰਗਾਂ ਖ਼ੈਰ ਮੈਂ ਰੱਬ ਤੋਂ 'ਕੈਫ਼ੀ' ਜੀ,
ਸ਼ਾਲਾ! ਦੂਰ ਬਲਾਵਾਂ ਮੇਰੇ ਸ਼ਹਿਰ ਦੀਆਂ ।
