ਕਿਉਂ ਖੋਈਆਂ ਨੇ ਸੱਜਣਾ ਰਾਹਵਾਂ ਪਿਆਰ ਦੀਆਂ ।
ਕਿੱਧਰ ਗਈਆਂ ਗੂੜ੍ਹੀਆਂ ਛਾਵਾਂ ਪਿਆਰ ਦੀਆਂ ।
ਸੱਜਣ ਬਣ ਕੇ ਲਾਏ ਨੇ ਫੱਟ ਲੋਕਾਂ ਨੂੰ,
ਰਹਿ ਗਈਆਂ ਅੱਜ ਖੁੱਲ੍ਹੀਆਂ ਬਾਹਵਾਂ ਪਿਆਰ ਦੀਆਂ ।
ਦਿਲ ਵਿਚ ਨਫ਼ਰਤ ਬੁੱਲ੍ਹੀਆਂ ਉੱਤੇ ਹਾਸੇ ਨੇ,
ਚੰਗੀਆਂ ਲੱਗਣ ਕਿੰਜ ਅਦਾਵਾਂ ਪਿਆਰ ਦੀਆਂ ।
ਦੌਲਤ ਦੀ ਛਣਕਾਰ ਕੰਨਾਂ ਵਿਚ ਵਸਦੀ ਏ,
ਗੱਲਾਂ ਕੀਹਨੂੰ ਜਾ ਸੁਣਾਵਾਂ ਪਿਆਰ ਦੀਆਂ ।
ਸ਼ਹਿਰਾਂ ਵਿਚ ਬਘਿਆੜ ਤੇ ਚੀਤੇ ਵਸਦੇ ਨੇ,
ਕਿੱਥੋਂ ਯਾਰੋ ਆਉਣ ਸਦਾਵਾਂ ਪਿਆਰ ਦੀਆਂ ।
ਧਰਤੀ ਖ਼ੁਸ਼ਕ ਤੇ ਬੱਦਲ ਨੇ ਅਸਮਾਨਾਂ ਤੇ,
ਰਲ-ਮਿਲ ਮੰਗੋ ਸਭ ਦੁਆਵਾਂ ਪਿਆਰ ਦੀਆਂ ।
ਕਿੱਧਰ ਗਏ ਉਹ ਦੌਰ 'ਰਹੀਲ' ਜਵਾਨੀ ਦੇ,
ਹੁੰਦੀਆਂ ਸਨ ਮਹਿਬੂਬ ਖ਼ਤਾਵਾਂ ਪਿਆਰ ਦੀਆਂ ।
