ਕੋਈ ਸ਼ਰਾਬ ਲਿਆਣੀ।
ਖਾਲੀ ਹਥ ਨ ਆਣਾਂ ਮੂਲੋਂ,
ਕੋਈ ਸ਼ਰਾਬ ਲਿਆਣੀ ।
ਜਿਹੜੀ ਦਿਲ ਨੂੰ ਹਰਿਆ ਕਰਦੀ;
ਨਾਲ ਫੁਲਾਂ ਜਿਉਂ ਟਾਹਣੀ ਭਰਦੀ,
ਕਾਲੀ ਘਟਾ ਜਦ ਆ ਵਰਸਾਏ
ਠੰਢਾ ਠੰਢਾ ਪਾਣੀ।
ਕੋਈ ਸ਼ਰਾਬ ਲਿਆਣੀ ।
ਜੇਹੜੀ ਦਿਲ ਨੂੰ ਸਾੜੇ ਫੂਕੇ,
ਅੱਗ ਬਣਾਂ ਦੀ ਜੀਕੁਰ ਸ਼ੂਕੇ;
ਸੁੱਕੀ ਹੋਈ ਸ਼ਾਖ ਸ਼ਾਖ ਨੂੰ
ਕਰਦੀ ਫਾਨੀ ਫਾਨੀ।
ਕੋਈ ਸ਼ਰਾਬ ਲਿਆਣੀ ।
ਭਾਵੇਂ ਵੈਹਸ਼ੀ ਨਾਚ ਨਚਾਵੇ,
ਭਾਵੇਂ ਗੋਤੇ ਅੰਦਰ ਪਾਵੇ,
ਬੇ-ਸੁਧੀਆਂ ਦੀ ਨੀਂਦਰ ਅੰਦਰ
ਭੁੱਲੇ ਸਭ ਕਹਾਣੀ।
ਕੋਈ ਸ਼ਰਾਬ ਲਿਆਣੀ ।
ਖੁਸ਼ੀ ਦੀਆਂ ਛੇੜੇ ਝਰਨਾਟਾਂ,
ਭਾਵੇਂ ਇਕਦਮ ਪਾਵੇ ਘਾਟਾਂ,
ਦਿਲ ਮੇਰੇ ਨੂੰ ਛੇਦ ਛੇਦ ਕੇ
ਕਰ ਦਏ ਛਾਨੀ ਛਾਨੀ।
ਕੋਈ ਸ਼ਰਾਬ ਲਿਆਣੀ ।
ਹੋਵੇ ਭਾਵੇਂ ਨਵੀਂ ਨਰੋਈ
ਹੁਣੇ ਹੁਣੇ ਦੀ ਕੱਢੀ ਹੋਈ,
ਚਾਹੇ ਬੜ੍ਹਕਾਂ ਛਡਵੀ ਹੋਵੇ
ਸਦੀਆਂ ਦੀ ਪੁਰਾਣੀ
ਕੋਈ ਸ਼ਰਾਬ ਲਿਆਣੀ ।
