ਕੂੜ ਭਰੇ ਇਲਜ਼ਾਮ ਇਨ੍ਹਾਂ ਸਿਰ ਧਰਿਓ ਨਾ ।
ਆਪਣਿਆਂ ਨੂੰ ਹੋਰ ਬਿਗਾਨੇ ਕਰਿਓ ਨਾ ।
ਅੱਗ ਦੇ ਜਾਇਉ ਆਪਣਾ ਸੇਕ ਭੁਲਾਇਉ ਨਾ,
ਠੰਡੀ ਪੌਣ ਤੋਂ ਡਰ ਕੇ ਐਵੇਂ ਠਰਿਓ ਨਾ ।
ਸੋਚਣ ਦੇ ਢੰਗ ਵੱਖੋ ਵੱਖਰੇ ਹੋ ਸਕਦੇ,
ਪਰ ਸੋਚਾਂ ਦੇ ਅੰਦਰ ਜ਼ਹਿਰਾਂ ਭਰਿਓ ਨਾ ।
ਜੰਗਜੂਆਂ ਦੇ ਜੇ ਵਾਰਿਸ ਅਖਵਾਉਂਦੇ ਹੋ,
ਜੰਗਾਂ ਲੜਨੇ ਤੋਂ ਪਹਿਲਾਂ ਹੀ ਹਰਿਓ ਨਾ ।
ਰੋਜ਼ ਲੁਟੇਰੇ, ਹਾਕਮ ਚੜ ਚੜ ਆਵਣਗੇ,
ਖੱਬੀ ਖਾਨਾਂ ਦੀ ਵੀ ਟੈਂਅ ਨੂੰ ਜਰਿਓ ਨਾ ।
ਮਾਵਾਂ ਦੀ ਅਰਦਾਸ ਖ਼ੁਦਾ ਦੇ ਘਰ ਅੰਦਰ,
ਹਾੜ੍ਹਾ ਪੁੱਤਰੋ ਸਾਥੋਂ ਪਹਿਲਾਂ ਮਰਿਓ ਨਾ ।
ਨਿੱਤ ਹਨੇਰੀ ਬਿਪਤਾ ਬਣ ਕੇ ਟੁੱਟੇਗੀ,
ਦੀਪ 'ਅਮਨ' ਦੇ ਬਣਿਉ, ਐ ਪਰ ਡਰਿਓ ਨਾ ।
