ਨੀ ਮੈਂ ਕਿਹੜੇ ਦੇਸ਼ ਉੱਡਾਂ
ਨੀ ਮੈਂ ਕਿਹੜੇ ਦੇਸ਼ ਜਾਵਾਂ ?
ਏਥੇ ਜੰਗ ਦੇ ਨੇ ਭਾਂਬੜ
ਉਥੇ ਕਾਲ ਦਾ ਪ੍ਰਛਾਵਾਂ ।
ਖਿੰਡੀ ਮੁਰਦਿਆਂ ਦੀ ਬਦਬੋ
ਉੜੀ ਜ਼ਿੰਦਗੀ ਦੀ ਖ਼ੁਸ਼ਬੋ
ਮਹਿਕਾਂ ਦਾ ਸੀਨਾ ਛਣਿਆਂ
ਛਲਨੀ ਹੋਈਆਂ ਹਵਾਵਾਂ ।
ਅਸੀਂ ਅੰਬਰਾਂ ਦੇ ਪੰਛੀ
ਸਾਰਾ ਹੀ ਅੰਬਰ ਸਾਂਝਾ
ਤੁਸੀਂ ਬੰਨਿਆਂ ਤੋਂ ਲੜਦੇ
ਜਣਿਆਂ ਹੈ ਕੈਸੀ ਮਾਵਾਂ ?
ਸਤਰੰਗੀ ਪੀਂਘ ਸਾਡੀ
ਦੇ ਰੰਗ ਹੋਏ ਧੁੰਦਲੇ
ਬੰਬਾਂ ਦਾ ਧੂਆਂ ਉੱਡਿਆ
ਜ਼ਖ਼ਮੀ ਹੋਈਆਂ ਹਵਾਵਾਂ ।
ਅਸੀਂ ਆਹਲਣਾ ਨਾ ਪਾਈਏ
ਅੱਗਾਂ ਨੇ ਸਾੜ ਦੇਣਾ
ਜ਼ਹਿਰਾਂ ਨੇ ਧਰਤੀ ਲੂਸੀ
ਨੀਂ ਮੈਂ ਕੀ ਪੀਆਂ ਕੀ ਖਾਵਾਂ ?
ਸੂਰਜ ਦੇ ਵੱਲ ਨੂੰ ਉੱਡੀਏ
ਅਸੀਂ ਸ਼ਾਮ ਤੇ ਸਵੇਰੇ
ਕਈ ਵਾਰ ਦਿਲ 'ਚ ਆਈ
ਆਦਮ ਨੂੰ ਰਾਹ ਵਿਖਾਵਾਂ ।
