ਕਰਾਂਤੀ, ਸੱਚ, ਕੁਰਬਾਨੀ, ਬੜਾ ਕੁਝ ਕਹਿ ਰਹੀ ਹੈ ਹੁਣ ।
ਸਮੇਂ ਦੀ ਚਾਲ ਮਸਤਾਨੀ ਬੜਾ ਕੁਝ ਕਹਿ ਰਹੀ ਹੈ ਹੁਣ ।
ਘਣੇ ਬੱਦਲ ਹਾਂ, ਲਿਸ਼ਕਾਂਗੇ, ਗਿਰਾਂ ਗੇ ਬਿਜਲੀਆਂ ਬਣਕੇ
ਅਸਾਡੀ ਸੋਚ ਅਸਮਾਨੀ, ਬੜਾ ਕੁਝ ਕਹਿ ਰਹੀ ਹੈ ਹੁਣ ।
ਸਮੁੰਦਰ ਨੇ ਸੀ ਅਜ਼ਲਾਂ ਤੋਂ, ਦਬਾਇਆ ਸ਼ੋਰ ਸੀਨੇ ਵਿਚ
ਇਹ ਉੱਠਦੀ ਲਹਿਰ ਤੂਫਾਨੀ, ਬੜਾ ਕੁਝ ਕਹਿ ਰਹੀ ਹੈ ਹੁਣ।
ਤੁਹਾਡੀ ਰੱਤ ਪੀ ਕੇ ਵੀ, ਇਹਨਾਂ ਦੀ ਪਿਆਸ ਨਹੀਂ ਬੁਝਣੀ
ਨਿਗਾਹਾਂ ਦੀ ਇਹ ਸ਼ੈਤਾਨੀ, ਬੜਾ ਕੁਝ ਕਹਿ ਰਹੀ ਹੈ ਹੁਣ।
ਹੈ ਮੱਧਮ ਪੈ ਗਈ ਇਹ, ਮਣਕਿਆਂ ਦੀ ਚਮਕ ਵੀ ਆਖਿਰ
ਸੁਮੈਰਾ ਦੇ ਗਲ਼ੇ ਗਾਨੀ, ਬੜਾ ਕੁਝ ਕਹਿ ਰਹੀ ਹੈ ਹੁਣ ।
