ਕੁਛ ਪਲ ਦਰਿਆ ਕੋਲ ਖਲੋ ਕੇ ਦੇਖਾਂਗੇ ।
ਇਸ ਵਿਚ ਅਪਣਾ ਸਾਇਆ ਧੋ ਕੇ ਦੇਖਾਂਗੇ।
ਫੁੱਲ ਸਦਾ ਹੀ ਵੰਡਦੇ ਆਏ ਖੁਸ਼ਬੂਆਂ,
ਫੁੱਲਾਂ ਵਰਗੇ ਆਪਾਂ ਹੋ ਕੇ ਦੇਖਾਂਗੇ ।
ਇਕਲਾਪੇ ਦੀ ਨਿੰਮੀ-ਨਿੰਮੀ ਧੁੱਪ ਅੰਦਰ,
ਯਾਦਾਂ, ਦੇ ਕੁਛ ਹਾਰ ਪਰੋ ਕੇ ਦੇਖਾਂਗੇ ।
ਸ਼ਾਮ-ਸਵੇਰੇ ਇੱਛਾ ਨੂੰ ਫ਼ਲ ਲੱਗੇਗਾ,
ਰੁੱਖਾਂ ਜਿੱਡੇ ਆਪਾਂ ਹੋ ਕੇ ਦੇਖਾਂਗੇ ।
ਤੇਰੇ ਸਾਏ ਕੋਲ ਲਿਜਾ ਕੇ ਸਾਏ ਨੂੰ,
ਏਦਾਂ ਤੇਰੇ ਕੋਲ ਖਲੋ ਕੇ ਦੇਖਾਂਗੇ,
ਅਪਣੇ ਤਨ ਦੀ ਵੀ ਪਰਖਾਂਗੇ ਖੁਸ਼ਬੂਈ,
ਖੁਸ਼ਬੂਆਂ ਤੋਂ ਦੂਰ ਖਲੋ ਕੇ ਦੇਖਾਂਗੇ ।
ਕਦ ਹੋਵੇਗੀ ਇਸ 'ਤੇ ਦਸਤਕ 'ਇਕਵਿੰਦਰ' ?
ਕਦ ਤੱਕ ਦਿਲ ਦਾ ਬੂਹਾ ਢੋ ਕੇ ਦੇਖਾਂਗੇ ?
