ਕੁਦਰਤ ਦਾ ਮੈਂ ਖੇਡ ਤਮਾਸ਼ਾ ਦੇਖ ਰਿਹਾਂ ।
ਅੱਲ੍ਹਾ ਦੀ ਇਹ ਸਾਜ਼ੀ ਦੁਨੀਆ ਦੇਖ ਰਿਹਾਂ ।
ਕੋਈ ਤੇ ਫਿਰਦਾ ਰਹਵੇ ਹਵਾਈ ਜਹਾਜ਼ਾਂ ਤੇ,
ਮੁਫ਼ਲਸ ਦਾ ਤੇ ਹਾਲ ਮੈਂ ਪਤਲਾ ਦੇਖ ਰਿਹਾਂ ।
ਮਹਿੰਗੀ ਹੋ ਗਈ ਹਰ ਇਕ ਸ਼ੈ ਇਸ ਦੁਨੀਆ ਦੀ,
ਬਸ ਇਨਸਾਨ ਨੂੰ ਸਸਤਾ ਵਿਕਦਾ ਦੇਖ ਰਿਹਾਂ ।
ਜੀਹਦਾ ਘਰ ਤਸਵੀਰ ਲੱਗੀ ਸਹਿਰਾਵਾਂ ਦੀ,
ਉਹਦੀ ਅੱਖ ਵਿਚ ਗੰਗਾ ਜਮਨਾ ਦੇਖ ਰਿਹਾਂ ।
ਹਰ ਚਿਹਰਾ ਇਕ ਨਵੀਂ ਕਹਾਣੀ ਕਹਿੰਦਾ ਏ,
ਹਰ ਕੋਈ ਕਰਦਾ ਨਵਾਂ ਡਰਾਮਾ ਦੇਖ ਰਿਹਾਂ ।
ਚਾਰ ਚੁਫ਼ੇਰੇ ਅੱਗ ਦੇ ਭਾਂਬੜ ਬਲਦੇ ਨੇ,
ਹਰ ਪਾਸੇ ਦੁਨੀਆ ਨੂੰ ਸੜਦਾ ਦੇਖ ਰਿਹਾਂ ।
ਬੇਵਸ ਨੂੰ ਤੂੰ ਜਿਉਂਦਾ ਜੀਅ ਨਾ ਆਖ 'ਰਹੀਲ',
ਰੋਜ਼ ਈ ਜਿਉਂਦਾ ਰੋਜ਼ ਈ ਮਰਦਾ ਦੇਖ ਰਿਹਾਂ ।
