ਕੁੱਝ ਸਹਿਰਾ ਆਬਾਦ ਕਰਨਗੇ, ਕੁੱਝ ਦੀਵਾਰਾਂ ਲੱਭਣਗੇ
ਇਹ ਬਸਤੀ ਜਦ ਉਜੜੇਗੀ ਤਾਂ ਕੈਸ਼ ਹਜ਼ਾਰਾਂ ਲੱਭਣਗੇ ।
ਕਿਸਰਾਂ ਮੱਥਾ ਲਾਵਾਂਗੇ ਫਿਰ ਵੇਲੇ ਦੇ ਮੁਖ਼ਤਾਰਾਂ ਨਾਲ,
ਖ਼ੌਫ਼ ਦੇ ਪਾਰੋਂ ਸਾਡੇ ਜਜ਼ਬੇ ਜੇਕਰ ਗ਼ਾਰਾਂ ਲੱਭਣਗੇ ।
ਗਿਣੇ ਚੁਣੇ ਕੁਝ ਸ਼ਬਦਾਂ ਤੱਕ ਮਹਿਦੂਦ ਕਰੋ ਨਾ ਸੋਚਾਂ ਨੂੰ,
ਨਵੀਆਂ ਬਹਿਰਾਂ ਲੱਭੋਗੇ ਤਾਂ, ਲਫ਼ਜ਼ ਹਜ਼ਾਰਾਂ ਲੱਭਣਗੇ ।
ਮੇਰੀ ਸੋਚ ਦੇ ਪਾਗਲ ਪੰਛੀ, ਜਾਵਣਗੇ ਜਿਸ ਪਾਸੇ ਨੂੰ,
ਮਸਤ ਫ਼ਿਜਾਵਾਂ, ਸ਼ੋਖ਼ ਅਦਾਵਾਂ, ਤੇ ਮਹਿਕਾਰਾਂ ਲੱਭਣਗੇ ।
ਇਹੋ ਜਿਹਾ ਵੀ ਦੌਰ ਆਵੇਗਾ, ਦੁਨੀਆਂ ਦੇ ਇਨਸਾਨਾਂ ਤੇ,
ਸਿਰ ਧਰਤੀ ਤੇ ਡਿੱਗੇ ਹੋਣਗੇ, ਪਰ ਦਸਤਾਰਾਂ ਲੱਭਣਗੇ ।
ਅੰਬਰਾਂ ਦੇ ਵਸਨੀਕ ਜੇ ਆਵਣ, ਧਰਤੀ ਤੇ ਇਕ ਵਾਰ 'ਸਲੀਮ',
ਟੁੱਕਣ ਮਾਰਣ ਦੇ ਲਈ ਉਹ ਵੀ ਬਸ ਦੀਵਾਰਾਂ ਲੱਭਣਗੇ ।
