ਲਾਲੀ ਮਿਰੇ ਚਿਹਰੇ ਤੇ ਚੜ੍ਹੀ ਹੁੰਦੀ ਏ ।
ਤਲਵਾਰ ਤੁਸੀਂ ਜਦ ਭੀ ਫੜੀ ਹੁੰਦੀ ਏ ।
ਇਕਰਾਰ, ਜਿਵੇਂ ਕੋਈ ਲੜੀ ਹੁੰਦੀ ਏ ।
ਇਕਰਾਰ, ਜਿਵੇਂ ਕੰਧ ਖੜੀ ਹੁੰਦੀ ਏ ।
ਲਗਦੈ ਕਿ ਤੁਸੀਂ ਆਉਗੇ ਮੈਨੂੰ ਮਾਰਨ
ਅਜ ਪੀੜ ਮਿਰੇ ਦਿਲ ਚ ਬੜੀ ਹੁੰਦੀ ਏ।
ਤੂੰ ਜਦ ਵੀ ਮਿਰੇ ਨਾਲ ਲੜਾਈ ਕਰਦੈਂ
ਤਕਦੀਰ ਮਿਰੇ ਨਾਲ ਲੜੀ ਹੁੰਦੀ ਏ ।
ਦੀਦਾਰ ਤਿਰਾ ਜਿਹੜੀ ਘੜੀ ਹੋ ਜਾਂਦੈ
ਉਹੀ ਤੇ ਕ਼ਿਆਮਤ ਦੀ ਘੜੀ ਹੁੰਦੀ ਏ ।
ਮਕ਼ਤਲ ਨੂੰ ਵੀ ਠੇਕਾ ਹੀ ਸਮਝਿਆ ਜਾਂਦੈ
ਜਦ ਕਾਂਗ ਮੁਹੱਬਤ ਦੀ ਚੜ੍ਹੀ ਹੁੰਦੀ ਏ ।
ਮਕ਼ਤੂਲ ਇਧੇ ਨਾਲ ਅਮਰ ਹੋ ਜਾਂਦੈ
ਤੇਗ਼ ਆਪਦੀ ਜਾਦੂ ਦੀ ਛੜੀ ਹੁੰਦੀ ਏ ।
ਬੀਮਾਰ ਤਿਰਾ ਇੰਵ ਉਡੀਕਾਂ ਕਰਦੈ
ਅਖੀਆਂ ‘ਚ ਜਿਵੇਂ ਜਾਨ ਅੜੀ ਹੁੰਦੀ ਏ ।
ਹਰ ਗਲ 'ਚ ਦਵੈਤੀ ਨੂੰ ਉਹ ਅੱਗੇ ਕਰਦੈ
‘ਹਮਦਰਦ' ਮਿਰੇ ਨਾਲ ਬੜੀ ਹੁੰਦੀ ਏ।
