ਮੌਤ ਕਹੇ ਕਿਉਂ ਝੇੜੇ ਕਰਦੀ ਗੱਲਾਂ ਕਰ ਤੁਰ ਜਾਣ ਦੀਆਂ
ਤੈਂ ਜੇਹੀਆਂ ਮੈਂ ਕਈ ਰਕਾਨਾਂ ਲਈਆਂ ਛੇਜਾਂ ਮਾਣ ਦੀਆਂ
ਸੁੰਦਰ ਰੂਪ ਅਪਾਰ ਜਿਨ੍ਹਾਂ ਦੇ ਸੱਈਆਂ ਇਕੋ ਹਾਣ ਦੀਆਂ
ਸੂਰਜ ਨਾਲ ਪਿਆਰ ਜਿਨ੍ਹਾਂ ਦੇ ਸਤੀਆਂ ਸਾਂਗ ਮਸਾਣ ਦੀਆਂ
ਤੇਰੇ ਨਾਲੋਂ ਚਤਰ ਬਾਂਦੀਆਂ ਕਈ ਚਰਿੱਤਰ ਜਾਣ ਦੀਆਂ
ਅਕਲ ਸ਼ਊਰ ਗੁਣਾਂ ਵਿਚ ਪੂਰਣ ਦੁੱਧੋਂ ਪਾਣੀ ਛਾਣ ਦੀਆਂ
ਹੰਸ ਕਬੂਤਰ ਮੋਰਾਂ ਨੂੰ ਉਹ ਝਾਤੀ ਪਾ ਪਾ ਰਾਣ ਦੀਆਂ
ਆਸ਼ਕ ਹੋਣ ਜਾਨਵਰ ਸਾਰੇ ਐਸੀ ਫਾਹੀ ਤਾਣ ਦੀਆਂ
ਇਕ ਦਿਨ ਆਣ ਪਵਾਈਆਂ ਓਨੀਂ ਮਹਿਲੀਂ ਕੂਕਾਂ ਕਾਣ ਦੀਆਂ
ਨੰਗੀਂ ਪੈਰੀਂ ਬੰਨ੍ਹ ਚਲਾਈਆਂ ਘੋੜੇ ਫ਼ੀਲ ਪਲਾਣ ਦੀਆਂ
ਜਾਂਦੀ ਵਾਰਾਂ ਯਾਦ ਕਰਦੀਆਂ ਖ਼ੁਸ਼ੀਆਂ ਪਹਿਨਣ ਖਾਣ ਦੀਆਂ
ਈਸ਼ਰ ਦਾਸਾ ਕੌਣ ਸਹਾਰੇ ਚੋਟਾਂ ਮੇਰੇ ਬਾਣ ਦੀਆਂ
