ਰਾਤੀਂ ਨੀਂਦ ਨਾ ਆਵੇ ਲੈਵਾਂ ਉੁਸੱਲਵੱਟੇ ਮੈਂ ।
ਤੇਰੇ ਜਾਣ ਪਿਛੋਂ ਆਹ ਦਿਨ ਵੀ ਕਿੱਦਾਂ ਕੱਟੇ ਮੈਂ ।
ਮੈਥੋਂ ਜਾਂ ਮੇਰੇ ਰੱਬ ਤੋਂ ਪੁੱਛ, ਮੇਰੇ ਮਹਿਰਮਾਂ ।
ਕਿੰਨੇ ਰੱਖੇ ਯਾਰਾ ਇਸ ਸੀਨੇ 'ਤੇ ਵੱਟੇ ਮੈਂ ।
ਤੇਰੇ ਗਮ ਸਤਾਈ ਸੁਣੀਆਂ ਖਰੀਆਂ ਖਰੀਆਂ ਮੈਂ ।
ਤੇਰੇ ਜਾਣ ਪਿੱਛੋਂ ਤਕਲੀਫਾਂ ਕਿੰਨੀਆਂ ਜਰੀਆਂ ਮੈਂ ।
ਮੈਥੋਂ ਜਾਂ ਮੇਰੇ ਰੱਬ ਤੋਂ ਪੁੱਛ, ਮੇਰੇ ਮਹਿਰਮਾਂ ।
ਤੈਨੂੰ ਮੰਨ ਕੇ ਬਾਵਾ ਕਿੰਨੀਆਂ ਮਿੰਨਤਾਂ ਕਰੀਆਂ ਮੈਂ ।
ਤੇਰੀ ਰਾਹ ਉੁਡੀਕਾਂ ਕੇਸ ਨਾ ਅੱਜ ਕੱਲ੍ਹ ਵਾਹੇ ਮੈਂ ।
ਕਈ ਦਿਨ ਹੋ ਗਏ ਨਾ ਤਨ ਤੋਂ ਲੀੜੇ ਲਾਹੇ ਮੈਂ ।
ਮੈਥੋਂ ਜਾਂ ਮੇਰੇ ਰੱਬ ਤੋਂ ਪੁੱਛ, ਮੇਰੇ ਮਹਿਰਮਾਂ ।
ਇੱਥੇ ਰੋਜ਼ ਹੀ ਚੜ੍ਹਦੀ ਇਸ਼ਕਾਂ ਵਾਲੇ ਫਾਹੇ ਮੈਂ ।
ਕੋਈ ਕੰਮ ਨਾ ਆਏ ਜਿਹੜੇ ਕੀਤੇ ਟੂਣੇ ਮੈਂ ।
ਤੇਰੇ ਇਸ਼ਕ ਦੇ ਫੱਲ ਨੇ ਤਾਂ ਹੀ ਕਰਦੀ ਦੂਣੇ ਮੈਂ ।
ਮੈਥੋਂ ਜਾਂ ਮੇਰੇ ਰੱਬ ਤੋਂ ਪੁੱਛ, ਮੇਰੇ ਅਰਜ਼ ਸਿਹਾਂ।
ਖਾਵਾਂ ਮਿੱਠੀਆਂ ਸੱਟਾਂ, ਪੀਵਾਂ ਹੰਝੂ ਲੂਣੇ ਮੈਂ ।
