ਮੇਰੀ ਮਾਂ ਘਰ ਵੱਸਦਾ ਰੱਬ ਓਏ,
ਕਿਤੇ ਆ ਕੇ ਵੇਖ ਲਈਂ ।
ਫਿਰ ਦੱਸੀਂ ਨਜ਼ਾਰੇ ਹੱਜ ਦੇ,
ਲੈ ਸ਼ਰਮ ਹਯਾ ਦੀ ਲੱਜ ਓਏ ।
ਪੈਰੀਂ ਮੱਥਾ ਟੇਕ ਲਈਂ ।
ਮੇਰੀ...
ਸੁੱਟ ਦੇਣੇ ਆਪਣੇ ਤੂੰ ਛੱਜ ਓਏ ।
ਸਤਿਕਾਰ ਦੇ ਵੇਖੇ ਜਦ ਚੱਜ ਓਏ ।
ਓਥੇ ਧੀਰਜਾਂ ਨਾਲ ਤੂੰ ਬੋਲਣਾ ।
ਤੇਰਾ ਕੋਈ ਨਹੀ ਚੱਲਣਾ ਪੱਜ ਓਏ ।
ਤੜਕੇ ਨਾਨਕ ਨਾਮ ਨੂੰ ਜੱਪਦਾ ।
ਮੇਰਾ ਗੁਰੂਦੁਆਰਾ ਵੇਖ ਲਈਂ ।
ਮੇਰੀ......
ਮੇਰੇ ਬਾਪ ਹੱਥ ਤੂਤ ਦੀ ਟਾਹਣੀ ਵੇ ।
ਜਿਹਦੀ ਛਮਕ ਛਾਵੇਂ ਜ਼ਿੰਦਗੀ ਮਾਣੀ ਓਏ ।
ਉਹਨਾਂ ਦੀ 'ਸਰਬ' ਹੈ ਧੀ ਧਿਆਣੀ ਓਏ ।
ਕਿਤੇ ਨਜ਼ਰ ਨਾ ਉਸ ਵੱਲ ਪਾਵੀਂ ਵੇ ।
ਤੇਰੇ ਕੱਢ ਦੇਣਗੇ ਚਿੱਬ ਓਏ ।
ਬਣ ਬੰਦਾ ਨੇਕ ਜਾਈਂ ।
ਮੇਰੀ..........
ਸਾਹਵੇਂ ਖੜਾ ਹੋਊ ਮੇਰਾ ਵੀਰ ਵੇ ।
ਤਿੱਖੇ ਨਜ਼ਰ ਦੇ ਮਾਰਦਾ ਤੀਰ ਓਏ ।
ਰਾਖੀ ਕਰਦਾ ਮਾਵਾਂ ਧੀਆਂ ਦੀ ।
ਪਤਾ ਅੰਦਰ-ਬਾਹਰ ਓਹਦੇ ਪੀਰ ਓਏ ।
ਓਥੇ ਨੰਗੇ ਪੈਰੀਂ ਜਾਵਣਾ ।
ਸਮਝਾਂ ਨਾਲ ਰੱਖਣਾ ਪੱਬ ਓਏ ।
ਬਣਾ ਸਾਦਾ ਭੇਖ ਜਾਈਂ ।
ਮੇਰੀ ਮਾਂ.......
