ਸਲਾਮ ਦੁਆ ਤਾਂ, ਲੋਕੋ ਹੁੰਦੀ ਆਈ ਹੈ ।
ਹੁੰਦੀ ਰਹੇਗੀ, ਦਸਤੂਰ-ਏ-ਜ਼ਮਾਨਾ ।
ਮੈਂ ਮੁਹੱਬਤ ਦਾ ਫ਼ਕੀਰ ਹਾਂ ।
ਲੋਟੇ 'ਚ ਮੁਹੱਬਤ ਪਾ ਦਿਓ ।
ਆਟੇ ਦੀ ਕੌਲੀ, ਲੋਕੀਂ ਯੋਗੀ ਪਾਂਵਦੇ ਝੋਲੀ ।
ਪਾਉਂਦੇ ਰਹਿਣਗੇ, ਮਿਥਿਆ ਪੈਮਾਨਾ ।
ਨੈਣਾਂ ਕਰਨਾ ਦਰਸ਼ ਹੈ ਯਾਰ ਦਾ ।
ਪਿਆਰ ਦਾ ਕੱਜਲਾ ਪਾ ਦਿਓ ।
ਤਪ ਕਰਦੇ ਆਏ ਹਾਂ, ਧੂਣੀਆਂ ਲਾ ਕੇ ।
ਕਰਦੇ ਰਹਾਂਗੇ, ਫ਼ੱਕਰਾਂ ਦਾ ਖ਼ਜ਼ਾਨਾ ।
ਜ਼ੁਲਫ਼ਾਂ ਵਿਯੋਗ 'ਚ ਜੁੜੀਆਂ ਧੋਣੀਆਂ ।
ਕੌਲਾ ਦਹੀਂ ਦਾ ਪਾ ਦਿਓ ।
ਸੱਥਰੀਂ ਬਹਿ ਗਾਉਂਦੇ ਨੇ ਯੋਗੀ ।
ਗਾਉਂਦੇ ਰਹਿਣਗੇ, ਯਾਰ ਵਿਯੋਗ 'ਚ ਗਾਣਾ ।
ਮਿਲਣ ਦੀ ਤੋੜ ਲੱਗੀ 'ਸਰਬ' ।
ਮਹਿਰਮ ਯਾਰ ਮਿਲਾ ਦਿਓ ।
ਯਾਰਾਂ ਦੀ ਬਸਤੀ 'ਚ, ਖੋ ਗਈ ਹਸਤੀ ।
ਖੋਂਦੀ ਰਹੇਗੀ, ਇਹ ਰੀਤ ਪੁਰਾਣੀ ।
ਜੇ ਯਾਰ ਦੀਦਾਰ ਨਾ ਹੋਸੀ ।
ਇਹ ਹਸਤੀ ਰਾਖ਼ ਮਿਲਾ ਦਿਓ ।
