ਰਾਧਾ ਅਤੇ ਰੁਕਮਣੀ
ਦੋਵਾਂ ਮਿੱਲ ਕੇ
ਕ੍ਰਿਸ਼ਨ ਨੂੰ ਮਾਰ ਦਿੱਤਾ ਹੈ
ਯੁੱਧ ਵਰਗਾ ਹੀ ਹੁੰਦਾ
ਯੁੱਧ ਕਰਨ ਕਰਾਵਣ
ਵਾਲੇ ਦਾ ਪਿਆਰ
ਆਪਣੀ ਹੱਤਿਆ ਤੋਂ
ਡਰਦੀਆਂ ਸਨ
ਰਾਧਾ ਅਤੇ ਰੁਕਮਣੀ ਦੋਵੇਂ
ਡਰਦਾ ਬੰਦਾ
ਕਦੋਂ ਪਿਆਰ ਕਰਦਾ
ਉਨ੍ਹਾਂ ਲਈ ਆਉਖਾ ਸੀ
ਯੁੱਧ ਵਾਲੇ ਚੋਂ ਮੁਰਲੀ ਵਾਲਾ ਕੱਢਣਾ
ਜਿੰਨਾ ਆਉਖਾ ਹੁੰਦਾ
ਲਹੂ ਅਤੇ ਲੋਹੇ ਵਾਲੇ ਨੂੰ
ਵੰਝਲੀ'ਚ ਪਾਉਣਾ
ਪਤਾ ਨਹੀਂ ਕੀ ਕੀ ਦੱਸੀ ਜਾਂਦਾ
ਕੁੜੀਆਂ ਨੂੰ ਗੀਤਾ ਨਹੀਂ
ਗੀਤ ਚਾਹੀਦੇ ਸੀ
ਉਨ੍ਹਾਂ ਮਾਰ ਦਿੱਤਾ
ਕੁੜੀਆਂ ਖੁਸ਼ ਹਨ
ਦੋਵਾਂ ਲਈ ਇਕ ਮਾਰਨਾ
ਕਿਤੇ ਸੌਖਾ ਸੀ
ਇਕ ਲਈ ਪੰਜ ਮਾਰਨ ਨਾਲੋਂ
ਉਨ੍ਹਾਂ ਮਾਰ ਦਿੱਤਾ
ਉਹ ਪਿਆਰ ਕਰਨ ਲਈ
ਅਜ਼ਾਦ ਹਨ
ਉਹ ਖੁਸ਼ ਹਨ।
