ਇਹਨਾਂ ਧੁੱਪ ਐਨਕਾਂ ਵਿਚ ਦੀ,
ਇਸ ਜੀਵਨ ਨੂੰ,
ਤੂੰ ਵੇਖਣ ਦੀ ਆਦੀ ਹੋਈ ।
ਠੀਕ ਹੈ ਇਹਨਾਂ ਸ਼ੀਸ਼ਿਆਂ ਵਿਚ ਦੀ,
ਇਸ ਜੀਵਨ ਦੇ ਕੋਝੇ ਕੋਝੇ,
ਕਾਲੇ ਕਾਲੇ ਦ੍ਰਿਸ਼ ਚੁਫੇਰੇ,
ਤੈਨੂੰ ਨੀਲੇ ਨੀਲੇ ਦਿਸਦੇ ।
ਪਰ ਤੈਨੂੰ ਮੈਂ ਇਕ ਗੱਲ ਦੱਸਾਂ,
ਇਹਨਾਂ ਨੀਲੇ ਰੰਗਾਂ ਤੋਂ ਵੱਖਰੇ ਵੀ,
ਇਸ ਜੀਵਨ ਵਿਚ ਰੰਗ ਅਨੇਕਾਂ ।
ਤੇਰੀਆਂ ਧੁੱਪ ਐਨਕਾਂ ਤੱਕ ਕੇ,
ਤੇਰੇ ਉਤੇ
ਮੈਨੂੰ ਬੜਾ ਤਰਸ ਹੈ ਆਉਂਦਾ ।
ਤੇਰੀ ਹਾਲਤ ਸਾਵਣ ਦੇ ਉਸ ਅੰਨ੍ਹੇ ਵਰਗੀ,
ਜਿਸ ਨੂੰ ਇਸ ਧਰਤੀ ਦੇ ਉਤੇ
ਹਰਿਆਵਲ ਹਰਿਆਵਲ ਦਿਸਦੀ ।
ਜੇ ਤੂੰ ਆਪਣੇ ਚਾਰ ਚੁਫੇਰੇ,
ਇਸ ਜੀਵਨ ਦਾ,
ਅਸਲੀ ਰੂਪ ਵੇਖਣਾ ਲੋਚੇਂ,
ਤਾਂ ਤੈਨੂੰ ਮੈਂ,
ਏਨਾ ਹੀ ਬਸ ਕਹਿ ਸਕਦਾ ਹਾਂ,
ਆਪਣੀਆਂ ਕਾਲੀਆਂ ਅੱਖਾਂ ਉਤੇ,
ਧੁੱਪ ਐਨਕਾਂ ਲਾਇਆ ਨਾ ਕਰ ।
ਵੰਨ-ਸਵੰਨੇ, ਇਸ ਜੀਵਨ ਦੇ,
ਰੰਗ ਵੇਖਣ ਤੋਂ
ਡਰਿਆ ਤੇ ਘਬਰਾਇਆ ਨਾ ਕਰ ।
