ਚੜ੍ਹਨ ਵਾਲਾ ਹੈ ਨਵਾਂ ਸਾਲ...
ਮੇਰੇ ਚੰਨ ਦੇ ਘਰ ਸਜੀ ਹੈ
ਤਾਰਿਆਂ ਦੀ ਮਹਿਫ਼ਲ
ਘਿਰਿਆ ਹੈ ਚੰਨ ਮੇਰਾ
ਸੁਹਣੇ ਰੌਸ਼ਨ ਪਰਵਾਰ ਨਾਲ
ਹਵਾ ਗਾ ਰਹੀ ਹੈ ਰਾਗ
ਸਮਾਂ ਦੇ ਰਿਹਾ ਹੈ ਤਾਲ
ਪਰ ਚੰਨ ਮੇਰੇ ਦਾ ਮਨ ਨਹੀਂ ਰੀਝਦਾ
ਕਿਸੇ ਵੀ ਸੁਰ ਤਾਲ ਦੇ ਨਾਲ
ਉਹ ਟੋਂਹਦਾ ਹੈ
ਵਾਰ ਵਾਰ ਆਪਣੀਆਂ ਜੇਬ੍ਹਾਂ
ਕਿੱਥੇ ਹੈ ਮੇਰਾ ਰੁਮਾਲ...
ਜਿਸ ਦੀ ਕੰਨੀ ਨਾਲ ਬੰਨਿਆਂ ਸੀ
ਇਕ ਨਾਮ
ਇਕ ਅੱਥਰੂ
ਇਕ ਸੁਪਨਾ
ਇਕ ਖ਼ਿਆਲ...
ਕਿਤੇ ਧੋਤਾ ਤਾਂ ਨਹੀਂ ਗਿਆ
ਧੋਣ ਵਾਲੇ ਕੱਪੜਿਆਂ ਦੇ ਨਾਲ
ਪਰ,
ਧੋ ਕੇ ਵੀ ਕਿੱਥੇ ਧੋਤਾ ਜਾਂਦਾ ਹੈ
ਉਹ ਸਭ ਕੁਝ
ਜੋ ਰਲ ਜਾਂਦਾ ਹੈ ਸਾਹਾਂ ਦੇ ਨਾਲ
ਤੇ ਚੰਨ ਮੇਰਾ ਟੋਹਣ ਲਗਦਾ ਹੈ
ਆਪਣੇ ਦਿਲ ਦਾ ਦਾਗ਼
ਦਿਲ ਦੇ ਸਾਜ਼ 'ਤੇ ਵੱਜ ਰਿਹਾ ਹੈ
ਕੋਈ ਹੋਰ ਹੀ ਰਾਗ-
ਛਿਣ ਭੰਗਰ ਨੇ ਰੰਗ ਦੁਨੀਆਂ ਦੇ
ਸੱਚਾ ਤੇ ਸਦੀਵੀ ਹੈ
ਰੂਹ ਦਾ ਵੈਰਾਗ
ਚੜ੍ਹਨ ਵਾਲਾ ਹੈ ਨਵਾਂ ਸਾਲ..
