ਓੜਕ ਉਹੋ ਲੋਕੀ ਖਾਂਦੇ ਮੇਵੇ ਤਾਜ਼ਾ ਤਾਜ਼ਾ ।
ਆਵਣ ਵਾਲੀ ਰੁੱਤ ਦਾ ਜਿਹੜੇ ਲਾ ਲੈਂਦੇ ਅੰਦਾਜ਼ਾ ।
ਝੱਖੜ ਝੁੱਲਿਆਂ ਤੇ ਨਹੀਂ ਤੱਕਣੇ ਉਹਨੇ ਕੱਚੇ-ਪੱਕੇ,
ਸਾਰੀ ਬਸਤੀ ਭੁਗਤੇਗੀ ਫਿਰ ਜੁਰਮਾਂ ਦਾ ਖ਼ੁਮਿਆਜ਼ਾ ।
ਅੱਜ ਅਸੀਂ ਨਾ ਪਾਣੀ ਕੋਲੋਂ ਪਾਣੀ ਪਾਣੀ ਹੁੰਦੇ,
ਪਾਣੀ ਦੀ ਗਹਿਰਾਈ ਦਾ ਜੇ ਲਾ ਲੈਂਦੇ ਅੰਦਾਜ਼ਾ ।
ਕੁੰਡਾ ਵੱਜਾ ਦੇਖ ਕੇ ਤੇਰੀ ਯਾਦ ਖਲੋ ਨਾ ਜਾਵੇ,
ਏਸੇ ਲਈ ਮੈਂ ਖੁੱਲ੍ਹਾ ਰੱਖਣਾ ਘਰ ਦਾ ਹਰ ਦਰਵਾਜ਼ਾ ।
ਇਸ ਤੋਂ ਵੱਧ ਹਮਦਰਦੀ ਕਰਦੇ ਹੋਰ ਭਲਾ ਕੀ 'ਸ਼ਾਹਿਦ'
ਚਿਹਰਿਆਂ ਉੱਤੇ ਯਾਰਾਂ ਮਲਿਆ ਮੇਰੇ ਖ਼ੂਨ ਦਾ ਗ਼ਾਜ਼ਾ ।
