ਜੇ ਕੋਲ ਨਹੀਂ ਕੁਝ ਮਾਇਆ ।
ਨਾ ਚਾਚਾ ਹੈ ਨਾ ਤਾਇਆ ।
ਨਾ ਫੁਫੀ ਨਾ ਮਾਸੀ ਤਾਈ ।
ਨਾ ਸੱਸ ਨਾ ਬਣੇ ਜਵਾਈ ।
ਬਿਨ ਜ਼ਰ ਹੈ ਲੋਲ੍ਹਾ ਢੱਗਾ ।
ਨਾ ਪਿਛਾ ਤੇ ਨਾ ਅੱਗਾ ।
ਨਾ ਯਾਰ ਦੀ ਨਿਭਦੀ ਯਾਰੀ ।
ਨਾ ਵੀਰ ਨਾ ਭੈਣ ਪਿਆਰੀ ।
ਬਿਨ ਜ਼ਰ ਹੈ ਹੁਸਨ ਵੀ ਫੋਕਾ ।
ਬਿਨ ਜ਼ਰ ਹੈ ਪਾਣੀ ਸੋਕਾ ।
ਜੇ ਕੋਲ ਨਹੀਂ ਹੈ ਛਾਂਦਾ ।
ਉਹਨੂੰ ਭਾਂਡੇ ਕੋਈ ਨਹੀਂ ਪਾਂਦਾ ।
ਨਾ ਸਾਵਣ ਦੀਆਂ ਬਹਾਰਾਂ ।
ਨਾ ਪੀਂਘਾਂ ਝੂਟਣ ਨਾਰਾਂ ।
ਨਾ ਜੋਬਨ ਅਤੇ ਜਵਾਨੀ ।
ਨਾ ਗਲ ਵਿਚ ਫਬਦੀ ਗਾਨੀ ।
ਬਿਨ ਪੈਸੇ ਕੁਝ ਨਹੀਂ ਲੱਭਦਾ ।
ਨਾ ਵਸਲ ਹੀ ਹੁੰਦਾ ਰੱਬ ਦਾ ।
ਨਾ ਕੰਮ ਕੋਈ ਹੁੰਦਾ ਪੂਰਾ ।
ਬਿਨ ਜ਼ਰ ਹੈ ਇਸ਼ਕ ਅਧੂਰਾ ।
ਨਾ ਛਾਤੀ ਦੇ ਵਿਚ ਜ਼ੋਰ ਏ ।
ਨਾ ਪ੍ਰੇਮ ਦੀ ਲੰਮੀ ਡੋਰ ਏ ।
ਬਿਨ ਜ਼ਰ ਹੈ ਖਾਲੀ ਕਾਸਾ ।
ਨਾ ਮੂੰਹ ਤੇ ਆਵੇ ਹਾਸਾ ।
ਨਾ ਆਦਰ ਨਾ ਅਬਰੂ ਏ ।
ਨਾ ਫੁੱਲਾਂ ਵਿਚ ਖ਼ੁਸ਼ਬੂ ਏ ।
ਬਿਨ ਪੈਸੇ ਚੌੜ ਚੋਪੱਟ ਏ ।
ਨਾ ਮੁੱਛਾਂ ਦੇ ਵਿਚ ਵਟ ਏ ।
ਉਹ ਭਲਾ ਮਾਣਸ ਹੈ ਕੈਸਾ ।
ਜਿਦ੍ਹੇ ਪਾਸ ਨਹੀਂ ਹੈ ਪੈਸਾ ।
