ਪੈਸਾ ਤੇ ਲੋਕੀਂ
ਪੈਸਾ ਅੱਗੇ-ਅੱਗੇ,
ਲੋਕੀਂ ਪਿੱਛੇ-ਪਿੱਛੇ,
ਪੈਸੇ ਤੇ ਲੋਕਾਂ ਦੀ ਇਹ ਰੇਸ,
ਬੱਚਿਆਂ ਦੀ ਖੇਡ,
ਛੂਹਣ-ਸਲੀਕੇ ' ਵਰਗੀ ਲਗਦੀ।
ਪੈਸੇ ਨੂੰ ਫੜਨ ਲਈ,
ਖੂਨ ਦੇ, ਦਿਲ ਦੇ ਰਿਸ਼ਤੇ ਉਜਾੜਦੇ ਲੋਕੀਂ,
ਕਾਦਰ ਦੀ ਕੁਦਰਤ, ਤੇ ਜ਼ਮੀਰ ਆਪਣਾ,
ਹੋਰ ਪਤਾ ਨਹੀਂ ਕੀ-ਕੀ ਪੈਰੀਂ ਲਿਤਾੜਦੇ ਲੋਕੀਂ।
ਪੈਸੇ ਨੂੰ ਫੜ ਵੀ ਲੈਂਦੇ,
ਪਰ ਪੈਸਾ ਖੜਦਾ ਕਿੱਥੇ ?
ਫਿਰ ਭੱਜ ਖਲੋਂਦਾ,
ਤੇ ਲੋਕੀਂ ਫਿਰ ਪਿੱਛੇ ਦੌੜਦੇ,
ਲੋਕੀਂ ਦੌੜਦੇ-ਦੌੜਦੇ ਬੁੱਢੇ ਹੋ ਜਾਂਦੇ,
ਇੰਝ ਇਹ ਰੇਸ ਕਦੇ ਨਾ ਮੁੱਕਦੀ,
ਆਖਿਰ ਮੌਤਰਾਣੀ ਹੀ,
ਰੇਸ ਦਾ 'ਦੀ ਐਂਡ' ਕਰਦੀ।
