ਪਲਕਾਂ ਉੱਤੇ ਨੀਰ ਸਜਾਈ ਫਿਰਨਾ ਵਾਂ ।
ਜ਼ਖ਼ਮਾਂ ਨੂੰ ਤਹਿਰੀਰ ਬਣਾਈ ਫਿਰਨਾ ਵਾਂ ।
ਨਾ ਪੁੱਛ ਜਗ ਨੇ ਮੈਨੂੰ ਕੀ ਕੁੱਝ ਬਖ਼ਸਿਆ ਏ,
ਜਿੰਦੜੀ ਲੀਰੋ-ਲੀਰ ਬਣਾਈ ਫਿਰਨਾ ਵਾਂ ।
ਹੋਰ ਤੇ ਸਭ ਕੁਝ ਖੋਹ ਲਿਆ ਮੈਥੋਂ ਸੱਜਨਾਂ ਨੇ,
ਸੋਚਾਂ ਦੀ ਜਾਗੀਰ ਬਚਾਈ ਫਿਰਨਾ ਵਾਂ ।
ਇਕ ਮੂਰਖ ਨੂੰ ਐਨਾਂ ਟੁੱਟ ਕੇ ਚਾਹਿਆ ਏ,
ਹਾਵਾਂ ਦੀ ਤਾਸ਼ੀਰ ਗਵਾਈ ਫਿਰਨਾ ਵਾਂ ।
ਬੇਸ਼ੱਕ ਇਹ ਗੱਲ ਪੁੱਛ ਲੈ ਮੁਨਸਫ਼ ਯਾਰਾਂ ਤੋਂ,
ਸੱਧਰਾਂ ਬੇ-ਤਕਸੀਰ ਲੁਟਾਈ ਫਿਰਨਾ ਵਾਂ ।
ਮੌਤ ਵੀ ਮੇਰੇ ਗ਼ਮ ਤੋਂ ਡਰ ਕੇ ਲੰਘਦੀ ਏ,
ਉਂਗਲਾਂ ਤੇ ਤਕਦੀਰ ਨਚਾਈ ਫਿਰਨਾ ਵਾਂ ।
'ਅਸਗ਼ਰ' ਮੈਨੂੰ ਰੱਜ ਕੇ 'ਬੇਲਾ' ਛਾਨਣ ਦੇ,
ਮੈਂ ਵੀ ਏਥੇ 'ਹੀਰ' ਖੜ੍ਹਾਈ ਫਿਰਨਾ ਵਾਂ ।
