ਪੂਰੇ ਕੱਦੋਂ ਨੀਵੇਂ ਵੀ ਦਸਤਾਰ ਨੇ ਉੱਚੇ ਕੀਤੇ ਨੇ ।
ਬੇਕਿਰਦਾਰੇ ਲੋਕਾਂ ਦੀ ਗੁਫ਼ਤਾਰ ਨੇ ਉੱਚੇ ਕੀਤੇ ਨੇ ।
ਜੇਸ ਨਿਉਂ ਕੇ ਉਮਰ ਗੁਜ਼ਾਰੀ ਕਦੀ ਮੁਰਾਦ ਉਸ ਪਾਈ ਨਾ,
ਉੱਚੇ ਲੱਗਣ ਜੋ ਤੇਰੇ ਦੀਦਾਰ ਨੇ ਉੱਚੇ ਕੀਤੇ ਨੇ ।
ਇਹਦਾ ਵੀ ਕੋਈ ਹਿੱਸਾ ਏ ਜੇ ਲੱਗੇ ਰੰਗ ਬਹਾਰਾਂ ਨੂੰ,
ਫੁੱਲ ਬਚਾ ਕੇ ਖ਼ਾਰਾਂ ਦੀ ਦੀਵਾਰ ਨੇ ਉੱਚੇ ਕੀਤੇ ਨੇ ।
ਕਿੰਨੇ ਲੋਕੀ ਜਿਉਂਦੀ ਜਾਨੇ ਮੁਰਦਿਆਂ ਵਾਂਗ ਜਿਉਂਦੇ ਰਹੇ,
ਥੋੜੇ ਜੇਹੇ ਜੱਲਾਦਾਂ ਦੀ ਤਲਵਾਰ ਨੇ ਉੱਚੇ ਕੀਤੇ ਨੇ ।
ਇੱਕੋ ਬੰਦਾ ਸਸਤਾ ਏ 'ਸੁਲਤਾਨ' ਮੇਰੇ ਤੋਂ ਪੁੱਛ ਲਵੋ,
ਕਿਹੜੀ ਕਿਹੜੀ ਸ਼ੈ ਦੇ ਭਾਅ ਬਾਜ਼ਾਰ ਨੇ ਉੱਚੇ ਕੀਤੇ ਨੇ ।
