ਆ ਵੀਰਾ ਵੰਡ ਲਈਏ ਭਾਰ
ਸਾਂਝੀ ਖੇਤੀ ਸਾਂਝੀ ਕਾਰ
ਸਾਂਝੀ ਜਿੱਤ ਤੇ ਸਾਂਝੀ ਹਾਰ ।
ਸਾਂਝੇ ਹੋਵਣ ਸੁਪਨੇ ਸਾਡੇ, ਸਾਂਝੇ ਹੋਵਣ ਖੇਤ
ਸਾਂਝੇ ਜੰਮਣ ਮਰਨ ਅਸਾਡੇ, ਸਾਂਝੇ ਹੋਵਣ ਭੇਤ
ਚਾਂਦੀ-ਵੰਨਾ ਪਾਣੀ ਪੀ ਕੇ ਸੋਨਾ ਉਗਲੇ ਖੇਤ
ਤੇਰੀ ਹੱਲ ਪੰਜਾਲੀ ਨੂੰ ਰਹੀ
ਬੰਜਰ ਧਰਤ ਪੁਕਾਰ ।
ਆ ਵੀਰਾ ਵੰਡ ਲਈਏ ਭਾਰ ।
ਸਾਂਝਾਂ ਦੇ ਵਿਚ ਬਰਕਤ ਵੱਸੇ, ਸਾਂਝਾਂ ਦੇ ਵਿਚ ਖੇੜਾ
ਸਾਂਝਾਂ ਵਿਚ ਪ੍ਰਮੇਸ਼ਰ ਵੱਸਦਾ ਸਾਂਝਾ ਸਭ ਦਾ ਵਿਹੜਾ
ਬੂੰਦ ਬੂੰਦ ਬਣ ਸਾਗਰ ਬਣਦਾ ਲਕੜੀ ਲਕੜੀ ਬੇੜਾ
ਗੋਤੇ ਖਾਵੇ ਜਿੰਦ ਇਕੱਲੀ
ਸਾਂਝ ਉਤਾਰੇ ਪਾਰ ।
ਆ ਵੀਰਾ ਵੰਡ ਲਈਏ ਭਾਰ ।
ਸਭੇ ਸਾਂਝੀਵਾਲ ਸਦਾਇਣ, ਹੋਵੇ ਸਾਡਾ ਨਾਅਰਾ
ਮੇਰ ਤੇਰ ਦੇ ਫ਼ਰਕਾਂ ਵਾਲਾ, ਮਿਟ ਜਾਏ ਪਾੜਾ ਸਾਰਾ
ਨਾ ਕੋਈ ਦੂਈ ਤਕੱਬਰ ਰਹਿ ਜਾਏ, ਨਾ ਨਫ਼ਰਤ ਨਾ ਸਾੜਾ
ਸੱਚੀ ਸਿਆਣੇ ਮੱਤ ਦੇਂਦੇ
ਸਾਂਝਾਂ ਨਾਲ ਬਹਾਰ ।
ਆ ਵੀਰਾ ਵੰਡ ਲਈਏ ਭਾਰ ।
