ਸਾਡਾ ਰੱਬ ਮਹਿੰਗੀਆਂ ਇਮਾਰਤਾਂ ਵਿਚ ਨਹੀਂ ਰਹਿੰਦਾ,
ਸਾਡਾ ਰੱਬ ਤਾਂ ਕੱਚੇ ਘਰਾਂ ਵਿਚ ਹੀ ਵੱਸਦਾ ਏ।
ਸਾਡਾ ਰੱਬ ਦੁਪਹਿਰੇ ਰੁੱਖਾਂ ਦੀ ਛਾਵੇਂ ਵੀ ਨਹੀਂ ਬਹਿੰਦਾ,
ਸਾਡਾ ਰੱਬ ਤਾਂ ਹਾੜ ਮਹੀਨੇ ਖੇਤਾਂ ਵਿਚ ਮੱਚਦਾ ਏ।
ਸਾਡਾ ਰੱਬ ਏ. ਸੀ. ਵਿਚ ਬਹਿ ਕੇ ਲੇਖਾ-ਜੋਖਾ ਨਹੀਂ ਕਰਦਾ,
ਸਾਡਾ ਰੱਬ ਤਾਂ ਭੱਠਿਆਂ ਲਈ ਇੱਟਾਂ ਥੱਪਦਾ ਏ।
ਸਾਡਾ ਰੱਬ ਕਾਲਜਾਂ 'ਚ ਕੁੜੀਆਂ ਤੇ ਕੁਮੈਂਟਸ ਨਹੀਂ ਕਰਦਾ,
ਸਾਡਾ ਰੱਬ ਤਾਂ ਖੂਬ ਦਿਲ ਲਾ ਕੇ ਲਿਖਦਾ ਪੜਦਾ ਏ।
ਸਾਡਾ ਰੱਬ ਸੁਬਾ-ਸਾਮ ਰੱਬ ਰੱਬ ਵੀ ਨਹੀਂ ਕਰਦਾ,
ਸਾਡਾ ਰੱਬ ਤਾਂ ਹਰ ਵੇਲੇ ਕੰਮ ਕੰਮ ਰੱਟਦਾ ਏ।
ਸਾਡਾ ਰੱਬ ਕੀਮਤੀ ਕਾਰਾਂ ਦੀ ਸਵਾਰੀ ਵੀ ਨਹੀਂ ਕਰਦਾ,
ਸਾਡਾ ਰੱਬ ਤਾਂ ਸਸਤਾ ਜਿਹਾ ਸਾਈਕਲ ਰੱਖਦਾ ਏ।
ਸਾਡਾ ਰੱਬ ਮਿਹਨਤਾਂ ਕਰਕੇ ਨੋਟਾਂ ਦੇ ਅੰਬਾਰ ਨਹੀਂ ਲਾਉਂਦਾ,
ਸਾਡਾ ਰੱਬ ਮਿਹਨਤ ਦਾ ਮੁੱਲ ਰੋਟੀ-ਪਸੀਨਾ ਵੱਟਦਾ ਏ।
