ਸਾਡੀ ਵੀ ਮਹਿਕ ਹੁੰਦੀ ਜੇਕਰ ਗੁਲਾਬ ਵਾਂਗਰ ।
ਸਾਡੀ ਵੀ ਹੁੰਦੀ ਚਰਚਾ ਚਰਚਿਤ ਕਿਤਾਬ ਵਾਂਗਰ ।
ਮੁਰਗਾਬੀਆਂ ਦਾ ਤਰਨਾ ਲਗਦਾ ਖੁਆਬ ਵਾਂਗਰ ।
ਅੱਜ ਕੱਲ੍ਹ ਹੈ ਅਪਣੀ ਹਾਲਤ ਸੁੱਕੇ ਤਲਾਬ ਵਾਂਗਰ ।
ਯਾਦਾਂ ਦੇ ਗ਼ਮਲਿਆਂ ਵਿਚ ਇੱਕ ਗੁਲਾਬ ਖਿੜਿਆ,
ਆਪਾਂ ਤਾਂ ਸਾਂਭਣਾ ਹੈ ਇਸ ਨੂੰ ਖ਼ਿਤਾਬ ਵਾਂਗਰ ।
ਕਾਲੇ ਦਿਨਾਂ ਦੇ ਬੱਦਲ ਬਹੁਤਾ ਸਮਾਂ ਨਾ ਰਹਿਣੇ,
ਆਪੇ ਹੀ ਲੱਥ ਜਾਣੇ ਇਕ ਦਿਨ ਖ਼ਿਜ਼ਾਬ ਵਾਂਗਰ ।
ਸੁੰਦਰ ਕਿਤਾਬ ਵਰਗੀ ਇਹ ਜ਼ਿੰਦਗੀ ਅਸਾਂ ਦੀ,
ਕੁਛ ਲੋਕ ਪੜ੍ਹ ਰਹੇ ਨੇ ਵਰਜਿਤ ਕਿਤਾਬ ਵਾਂਗਰ ।
ਸਾਡੀ ਹਰੇਕ ਸ਼ੈਅ ਨੂੰ ਲਲਚਾ ਰਹੇ ਗੁਆਂਢੀ,
ਸਾਨੂੰ ਸਮਝ ਰਹੇ ਨੇ ਭੋਲੇ ਪੰਜਾਬ ਵਾਂਗਰ ।
ਹੁਸ਼ਿਆਰਪੁਰ ਦੇ ਪਰਬਤ ਕੋਹਤੂਰ ਦੀ ਤਰ੍ਹਾਂ ਹਨ,
ਹੁਸ਼ਿਆਰਪੁਰ ਦੇ ਚੋਅ ਹਨ ਬਿਲਕੁਲ ਝਨਾਬ ਵਾਂਗਰ ।
ਅੱਧ-ਰਾਤ ਤੱਕ ਸਿਰ੍ਹਾਣੇ ਬੱਤੀ ਜਗਾ ਕੇ ਅੱਜ ਕੱਲ੍ਹ,
ਅਖ਼ਬਾਰ ਨੂੰ ਵੀ ਲੋਕੀ ਪੜ੍ਹਦੇ ਕਿਤਾਬ ਵਾਂਗਰ ।
ਅਫ਼ਸੋਸ ! ਐਤਕੀਂ ਦੀ ਰਹਿਣਾ ਬਹਾਰ ਦਾ ਹੈ,
ਇਕ ਵਾਰ ਵੀ ਨਾ ਮਹਿਕੇ ਆਪਾਂ ਗੁਲਾਬ ਵਾਂਗਰ ।
