ਡੂੰਘੇ ਰਿਸ਼ਤੇ ਸੱਜਣ ਤੁਰਗੇ, ਰਹਿ ਗਏ ਅਸੀਂ ਇੱਕਲੇ ਹਾਂ।
ਸਾਡਾ ਕਿਧਰੇ ਦਿਲ ਨਾ ਲੱਗੇ, ਅਸੀਂ ਬਹਿਸ਼ਤ ਨੂੰ ਚੱਲੇ ਹਾਂ।
ਖੂਨ ਦੇ ਦੀਵੇ ਬਾਲ ਅਸੀਂ, ਰੁਸ਼ਨਾਇਆ ਉਹਦੀ ਜਿੰਦਗੀ ਨੂੰ।
ਸਭ ਕੁਝ ਆਪਣਾ ਵਾਰ ਅਸੀਂ,ਮਹਿਕਾਇਆ ਉਹਦੀ ਜਿੰਦਗੀ ਨੂੰ।
ਹੱਥ ਕਿਸੇ ਹੁਣ ਹੋਰ ਨੂੰ ਦੇ, ਕਹਿੰਦੇ ਵੱਧ ਸੁਖੱਲੇ ਹਾਂ।
ਸਾਡਾ ਕਿਧਰੇ ਦਿਲ ਨਾ ਲੱਗੇ, ਅਸੀਂ ਬਹਿਸ਼ਤ ਨੂੰ ਚੱਲੇ ਹਾਂ।
ਰੰਗ ਆਪਣੇ ਛੱਡ ਅਸੀਂ, ਰੰਗੀਨ ਕਰੀ ਉਹਦੀ ਜਿੰਦਗੀ ਸੀ।
ਛੱਡ ਹਰ ਖੁਸ਼ੀ ਆਪਣੀ,ਵੱਲ ਮੋੜ ਦਿੱਤੀ ਉਹਦੀ ਜਿੰਦਗੀ ਸੀ।
ਸਾਡੇ ਬਿਨ ਨੀ ਸਾਹ ਸੀ ਲੈਂਦੀ,ਕਹਿੰਦੀ ਹੁਣ ਅਸੀਂ ਝੱਲੇ ਹਾਂ।
ਸਾਡਾ ਕਿਧਰੇ ਦਿਲ ਨਾ ਲੱਗੇ, ਅਸੀਂ ਬਹਿਸ਼ਤ ਨੂੰ ਚੱਲੇ ਹਾਂ।
ਆਪਣੀ ਮੰਜ਼ਿਲ ਛੱਡ ਅਸੀਂ, ਰਾਹ ਮੋੜ ਉਹਨਾਂ ਦੇ ਨਾਲ ਤੁਰੇ।
ਰਿਸ਼ਤੇ- ਨਾਤੇ ਤੋੜ ਸਾਰੇ, ਅਸੀਂ ਜਾ ਉਹਨਾਂ ਦੇ ਨਾਲ ਖੜ੍ਹੇ।
ਠਗਿਆ ਹੋਇਆ ਜਾਪੇ ਹੁਣ,ਭੀੜਾਂ ਵਿਚ ਇਕੱਲੇ ਹਾਂ।
ਸਾਡਾ ਕਿਧਰੇ ਦਿਲ ਨਾ ਲੱਗੇ, ਅਸੀਂ ਬਹਿਸ਼ਤ ਨੂੰ ਚੱਲੇ ਹਾਂ।
ਆਪਣਾ ਸਭ ਕੁਝ ਫਿੱਕਾ ਕਰ, ਮਿਠਾਸ ਭਰੀ ਉਹਦੀ ਜਿੰਦਗੀ ਵਿੱਚ।
ਆਪਣੀ ਖੁਸ਼ੀ ਨੂੰ ਲਾ ਖੂੰਜੇ, ਮੁਸਕਾਨ ਭਰੀ ਉਹਦੀ ਜਿੰਦਗੀ ਵਿੱਚ।
ਠੰਡਕ ਸਾਰੀ ਨਾਲ ਲਈ, ਸੁੱਖੇ ਗਰਮ ਹਵਾ ਦੇ ਬੁੱਲੇ ਹਾਂ,
ਸਾਡਾ ਕਿਧਰੇ ਦਿਲ ਨਾ ਲੱਗੇ, ਅਸੀਂ ਬਹਿਸ਼ਤ ਨੂੰ ਚੱਲੇ ਹਾਂ।
