ਸੰਨ੍ਹਾਂ ਲਾਵਣ ਪਹਿਰੇਦਾਰ ਤੇ ਕੀ ਕਰੀਏ ।
ਮੁਨਸਫ਼ ਹੋਵਣ ਡੰਡੀ ਮਾਰ ਤੇ ਕੀ ਕਰੀਏ ।
ਬੋਲਣ ਦਾ ਵਲ ਕੱਲ੍ਹ ਜਿਨ੍ਹਾਂ ਨੂੰ ਦੱਸਿਆ ਸੀ,
ਉਹ ਵੀ ਕਰਨ ਜੇ ਅੱਜ ਤਕਰਾਰ ਤੇ ਕੀ ਕਰੀਏ ।
ਜਿਹਨਾਂ ਤੇ ਸੀ ਗ਼ਮਖ਼ਾਰੀ ਦਾ ਮਾਨ, ਜੇ ਉਹਰਾਹ
ਦੀ ਬਣ ਜਾਵਣ ਦੀਵਾਰ ਤੇ ਕੀ ਕਰੀਏ ।
ਔਖੇ ਵੇਲੇ ਭਾਰ ਵੰਡਣ ਦੀ ਥਾਂ ਜੇਕਰ,
ਛੱਡ ਜਾਵਣ ਸਾਨੂੰ ਦਿਲਦਾਰ ਤੇ ਕੀ ਕਰੀਏ ।
ਜਿਨ੍ਹਾਂ ਦੇ ਨਾਂ ਆਪਣਾ ਜੀਵਨ ਲਾਇਆ ਸੀ,
ਪੁੱਛਣ ਨਾ ਜੇ ਉਹ ਵੀ ਸਾਰ ਤੇ ਕੀ ਕਰੀਏ ।
ਰਿਸ਼ਵਤ ਬਾਝੋਂ ਮਜ਼ਦੂਰੀ ਵੀ ਲੱਭਦੀ ਨਈਂ,
ਫਿਰੀਏ ਨਾ ਜੇ ਇੰਜ ਬੇਕਾਰ ਤੇ ਕੀ ਕਰੀਏ ।
ਉਹ ਦਿਨ-ਰਾਤੀ ਆਵਣ ਟੀ. ਵੀ. ਤੇ 'ਅਨਵਰ'
ਸਾਨੂੰ ਛਾਪਣ ਨਾ ਅਖ਼ਬਾਰ ਤੇ ਕੀ ਕਰੀਏ ।
