ਸੌ ਮੁਸੀਬਤ ਸੌ ਤਸੀਹੇ ਜਰ ਰਿਹਾ ਹੈ ਆਦਮੀ ।
ਆਪਣੀ ਛਾਂ ਵਿਚ ਗੁਜ਼ਾਰਾ ਕਰ ਰਿਹਾ ਹੈ ਆਦਮੀ ।
ਆਪਣੇ ਕਿਰਦਾਰ ਕੋਲੋਂ ਡਰ ਰਿਹਾ ਹੈ ਆਦਮੀ ।
ਹੁਣ ਨਹੀਂ ਵਿਸ਼ਵਾਸ ਦਾ ਪਾਤਰ ਰਿਹਾ ਹੈ ਆਦਮੀ ।
ਖ਼ਾਹਿਸ਼ਾਂ ਦੇ ਖ਼ਾਕਿਆਂ ਨੂੰ ਭਰ ਰਿਹਾ ਹੈ ਆਦਮੀ ।
ਕਹਿਕਸ਼ਾਵਾਂ ਦੀ ਨੁਮਾਇਸ਼ ਕਰ ਰਿਹਾ ਹੈ ਆਦਮੀ ।
ਜੁਗਨੂੰਆਂ ਨੂੰ ਪਕੜਦਾ ਹੈ ਅੱਗ ਨੂੰ ਛੂੰਹਦਾ ਹੈ ਇਹ,
ਆਦਮੀ ਦੇ ਵਾਂਗ ਹੀ ਤਾਂ ਕਰ ਰਿਹਾ ਹੈ ਆਦਮੀ ।
ਜੋ ਕਦੇ ਸਾਗਰ ਦੇ ਸੁੱਕਣ 'ਤੇ ਨਹੀਂ ਸੀ ਡੋਲਿਆ,
ਬੂੰਦ ਦੇ ਸਿਮਟਣ 'ਤੇ ਅੱਖੀਆਂ ਭਰ ਰਿਹਾ ਹੈ ਆਦਮੀ ।
ਜ਼ਿਹਨ ਦੇ ਸਾਗਰ 'ਚ ਇਸ ਨੂੰ ਲਾਉਣ ਦੇਵੋ ਤਾਰੀਆਂ,
ਜ਼ਿੰਦਗਾਨੀ ਦੇ ਤਜਰਬੇ ਕਰ ਰਿਹਾ ਹੈ ਆਦਮੀ ।
ਰੋਜ਼ ਹੀ ਉਸ ਦੀ ਸਮਾਧੀ ਭੰਗ ਕਰ ਦਿੰਦਾ ਹੈ ਇਹ,
ਸੋਚਦਾ ਅਸਮਾਨ ਹੈ ਕੀ ਕਰ ਰਿਹਾ ਹੈ ਆਦਮੀ ?
ਇਸ ਨੂੰ 'ਇਕਵਿੰਦਰ' ਸਮੇਂ ਨੇ ਇਹ ਕੀ ਦਿੱਤਾ ਹੈ ਸਰਾਪ ?
ਜੀਉਣ ਜੋਗਾ ਜੀਅ ਰਿਹਾ ਨਾ ਮਰ ਰਿਹਾ ਹੈ ਆਦਮੀ ।
