ਸੀਨ-ਸਾਈਂ ਬਰਸਰ ਚਸ਼ਮ ਕਬੂਲ ਕੀਤੀ
ਦਿਲ ਮੰਨੇ ਸਭ ਫਰਮਾਣ ਤੈਂਡੇ ।
ਇਹ ਅੱਖੀਆਂ ਤਕ ਲੱਗਣ ਵਿੱਚ ਦਿਲ ਦੇ
ਕਈ ਡੰਗੀਆਂ ਪਲਕਾਂ ਬਾਣ ਤੈਂਡੇ ।
ਰਾਜਾ ਗੋਲਿਆਂ ਦੇ ਪੜਗੋਲੇ ਨੇ ਇਹ
ਰਾਜਾ ਤੇ ਸੁਲਤਾਨ ਤੈਂਡੇ ।
ਇਹ ਖੂਬਸੂਰਤਾਂ ਮੂਰਤਾਂ ਭੀ
ਜਿਵੇਂ ਆਰਸੀਆਂ ਹੈਰਾਨ ਤੈਂਡੇ ।
ਇਹ ਚੰਨ ਸੂਰਜ ਅਤੇ ਦੌਰਿ-ਜ਼ਮਾਂ ਭੀ
ਸਦਕੜੇ ਤੇ ਕੁਰਬਾਨ ਤੈਂਡੇ ।
ਇਹ ਦੇਹ ਰਾਤ ਨਿਸ਼ਾਨੀ ਤੈਂਡੀ
ਹਰ ਦੇਂਹ ਨੌ ਨੌ ਸ਼ਾਨ ਤੈਂਡੇ ।
ਬਾਝ ਤੈਂਡੇ ਉਹ ਭਾ ਦੋਜ਼ਖ ਦੀ
ਉਹ ਬਾਗ ਅਤੇ ਬੁਸਤਾਨ ਤੈਂਡੇ ।
'ਫਿਲ ਹਕੀਕਤ ਕੁੱਲ ਹਕਾਇਕ'
ਦਾਨ ਤੈਂਡੇ ਇਹਸਾਨ ਤੈਂਡੇ ।
ਇਹ ਹੈਦਰ ਆਜਿਜ਼ ਬੰਦਾ ਤੈਂਡਾ,
ਕਿਆ ਕੁਝ ਕਰੇ ਬਿਆਨ ਤੈਂਡੇ ।੫।
