ਸੀਨੇ 'ਚ ਜੇ ਖ਼ੁਦੀ ਨਹੀਂ,
ਜ਼ਿੰਦਗੀ ਜ਼ਿੰਦਗੀ ਨਹੀਂ,
ਬੰਦਾ ਜੇ ਬੰਦਾ ਹੀ ਰਿਹਾ
ਬੰਦਗੀ ਬੰਦਗੀ ਨਹੀਂ ।
ਤੇਰਾ ਨਿਖਾਰ ਬੇਮਿਸਾਲ
ਤੇਰੀ ਨੁਹਾਰ ਹੈ ਕਮਾਲ,
ਚੇਹਰੇ ਤੇ ਗ਼ਮ ਦਾ ਨੂਰ ਨਹੀਂ
ਅੱਖੀਆਂ ਦੇ ਵਿਚ ਨਮੀ ਨਹੀਂ ।
ਓ ਮੇਰੇ ਬਦਨਸੀਬ ਦੋਸਤ
ਤੂੰ ਕਿਉਂ ਗ਼ਰੀਬ ਗ਼ਮ ਬਿਨਾ,
ਅਪਣੇ ਨਸੀਬ ਨੂੰ ਜਗਾ
ਗ਼ਮ ਦੀ ਤਾਂ ਕੁਝ ਕਮੀ ਨਹੀਂ ।
ਮੇਰੇ ਬਦਨ ਤੋਂ ਲਾਸ ਨੂੰ
ਖਾ ਕੇ ਤਰਸ ਅਜੇ ਨ ਪੂੰਝ,
ਹਾਲੇ ਮੈਂ ਆਹ ਭਰੀ ਨਹੀਂ
ਧਰਤੀ ਅਜੇ ਹਿਲੀ ਨਹੀਂ।
ਆਦਮ ਦੀ ਸੱਪ-ਵਲ੍ਹੇਟ ਵਿਚ
ਬੇਹੋਸ਼, ਬੇਜ਼ੋਰ ਆਦਮੀ,
ਸੁਣਿਆ ਏ ਮੈਂ ਵੀ ਹਾਂ ਆਦਮੀ
ਨਾ ਨਾ ਮੈਂ ਆਦਮੀ ਨਹੀਂ।
ਪੀੜਾਂ 'ਚ ਪੀੜ ਦੀ ਦਵਾ
ਏਨੀ ਤਾਂ ਮੈਨੂੰ ਹੋਸ਼ ਨਹੀਂ,
ਤੈਨੂੰ ਸਿਆਣ ਨਾ ਸਕਾਂ,
ਏਨੀ ਵੀ ਬੇਖ਼ੁਦੀ ਨਹੀਂ।
