ਸਹਿਰਾ ਵਿਚ ਸਾਵਣ ਲੈ ਆਵੀਂ ਸਾਂਵਰਿਆ।
ਵਸਲਾਂ ਦਾ ਫਿਰ ਮੀਂਹ ਵਰਸਾਵੀਂ ਸਾਂਵਰਿਆ।
ਬਰਸਣ ਦੇ ਹੁਣ ਮੋਹ ਦੇ ਬੱਦਲ ਬਰਸਣ ਦੇ
ਹੁਣ ਨਾ ਨੈਣੋਂ ਨੀਰ ਵਹਾਵੀਂ ਸਾਂਵਰਿਆ ।
ਮਨ ਦੀ ਵੀਣਾ ਛੇੜੇ ਸੈਆਂ ਰਾਗਣੀਆਂ
ਰਾਗ ਕੋਈ ਮਲਹਾਰ ਸੁਣਾਵੀਂ ਸਾਂਵਰਿਆ।
ਮੈਂ ਘਣਘੋਰ ਘਟਾ ਬਣਕੇ ਜਦ ਆਵਾਂਗੀ
ਮੋਰ ਬਣੀਂ ਤੂੰ ਪੈਲਾਂ ਪਾਵੀਂ ਸਾਂਵਰਿਆ।
ਵਹਿ ਜਾਵਣ ਦੇ ਹਿਜ਼ਰਾਂ ਵਾਲੀ ਵੇਦਣ ਨੂੰ
ਹੁਣ ਨਾ ਦਿਲ ਦਾ ਦਰਦ ਹੰਢਾਵੀਂ ਸਾਂਵਰਿਆ।
ਅੰਬਰ ਤਾਈੰ ਛੁਹਣਾ ਮੇਰੇ ਖ਼ਾਬਾਂ ਨੇ
ਸਤਰੰਗੀ ਤੂੰ ਪੀਂਘ ਝੁਟਾਵੀਂ ਸਾਂਵਰਿਆ।
