ਸ਼ਾਮ ਢਲੇ ਤੇ ਆਪਣਾ ਸੀਨਾ ਠਾਰੇ ਰਾਤ ।
ਚੰਨ ਨੂੰ ਵੇਖੇ ਨਾਲੇ ਵੇਖੇ ਤਾਰੇ ਰਾਤ ।
ਮਿੱਠੀ ਨੀਂਦਰ ਸੌਂਦੇ ਲੋਕੀ ਬਿਸਤਰ ਤੇ,
ਸਾਡੀ ਨੀਂਦ ਉਡਾ ਕੇ ਪੈਰ ਪਸਾਰੇ ਰਾਤ ।
ਟੁਰਦੀ ਟੁਰਦੀ ਥੱਕ ਜਾਂਦੀ ਏ ਆਪ ਜਦੋਂ,
ਸੂਰਜ ਪਿੱਛੇ ਲੁਕ ਕੇ ਥਕਨ ਉਤਾਰੇ ਰਾਤ ।
ਲੋਕੀ ਸ਼ਿਕਵਾ ਕਰਦੇ ਨਿੱਕੀਆਂ ਰਾਤਾਂ ਦਾ,
ਸਾਨੂੰ ਲੱਗਣ ਪਲ ਵੀ ਭਾਰੇ ਭਾਰੇ ਰਾਤ ।
ਦਿਲ ਤੇ ਜਰਦਾ ਤਾਅਨੇ ਸਭਨਾਂ ਸੱਧਰਾਂ ਦੇ,
ਤਾਰੇ ਗਿਣ ਗਿਣ ਕੱਟਦੇ ਨੈਣ ਵਿਚਾਰੇ ਰਾਤ ।
ਕਰਦੇ ਨੇ ਇਤਬਾਰ ਕਿਸੇ ਦਾ 'ਆਗ਼ਾ' ਜੋ,
ਉਨ੍ਹਾਂ ਨੂੰ ਤਰਸਾ ਤਰਸਾ ਕੇ ਮਾਰੇ ਰਾਤ ।
