"ਓ ਲਾਰਡ ਉਡਵਾਇਰ ਤੂੰ ਵੇਖ ਆ ਕੇ,
ਗੱਲ ਇਸ਼ਕ ਦੀ ਟਾਲੀ ਨਹੀਂ ਜਾ ਸਕਦੀ।
ਖੂਨ ਆਸ਼ਕਾਂ ਦਾ ਓੜਕ ਰੰਗ ਲਾਂਦਾ,
ਬਿਰਥਾ ਘਾਲਣਾ ਘਾਲੀ ਨਹੀਂ ਜਾ ਸਕਦੀ।
ਜਿਹੜੇ ਬਾਗ਼ ਨੂੰ ਜਾਲਮਾ ਅੱਗ ਲਾਈ,
ਖੁਸ਼ਬੂ ਓਹਦੀ ਸੰਭਾਲੀ ਨਹੀਂ ਜਾ ਸਕਦੀ।
ਬੂਟੇ ਫੁੱਲਾਂ ਦੇ ਲੂਹੇ ਤਾਂ ਜਾ ਸਕਦੇ,
ਮਹਿਕ ਫੁੱਲਾਂ ਦੀ ਬਾਅਲੀ ਨਹੀਂ ਜਾ ਸਕਦੀ।"
"ਫੁੱਲ ਹੱਸਦੇ ਕਲੀਆਂ ਮੁਸਕਾਂਦੀ ਆਂ ਨੇ,
ਸਾਡੇ ਬਾਗ਼ ਵਿੱਚ ਫੇਰ ਬਹਾਰ ਆਈ।
ਸਾਡੇ ਗੱਲ ਵਿੱਚ ਜਿੱਤ ਨੇ ਹਾਰ ਪਾਏ,
ਤੇਰੇ ਫੇਰ ਨਸੀਬਾਂ ਨੂੰ ਹਾਰ ਆਈ।
ਊਧਮ ਸਿੰਘ ਤੂੰ ਅਮਰ ਹੈਂ ਜੱਗ ਅੰਦਰ,
ਅਸੀਂ ਰੱਜ ਕੇ ਤੈਨੂੰ ਪਿਆਰ ਦੇਈਏ।
ਤੂੰ ਇੱਕ ਵੈਰੀ ਵੰਗਾਰ ਕੇ ਮਾਰਿਆ ਸੀ,
ਅਸੀਂ ਤੇਰੇ ਤੋਂ ਜਿੰਦੜੀਆਂ ਵਾਰ ਦੇਈਏ।"
"ਤੇਰੇ ਪੈਰਾਂ ਦੀ ਛੋਹ ਨੂੰ ਤਰਸਦੀ ਏ
ਜਲਿਆਂ ਵਾਲੇ ਦੇ ਬਾਗ਼ ਦੀ ਖ਼ਾਕ ਬੀਬਾ,
ਤੂੰ ਮੁਸ਼ਤਾਕ ਸੀ ਵਤਨ ਦਾ ਦਰਦਮੰਦਾ
ਤੇਰਾ ਵਤਨ ਹੈ ਤੇਰਾ ਮੁਸ਼ਤਾਕ ਬੀਬਾ।"
