ਛੇਵੀਂ ਹਿਸ ਦੀ ਖ਼ਬਰ ਜਿਹੀ ਏ ।
ਉਹਦੀ ਦਿਲ 'ਤੇ ਨਜ਼ਰ ਜਿਹੀ ਏ ।
ਮਿੱਠੀਆਂ-ਮਿੱਠੀਆਂ ਮੁਸਕਾਨਾਂ ਨੇ,
ਦਿਲ ਵਿੱਚ ਪਿੰਡ ਦੀ ਫ਼ਜ਼ਰ ਜਿਹੀ ਏ ।
ਅੱਥਰੂ, ਚੀਕਾਂ, ਹੌਕੇ, ਹਾਵੇ,
ਦਿਲ ਦੀ ਹਾਲਤ 'ਹਸ਼ਰ' ਜਿਹੀ ਏ ।
ਰਾਤੀਂ ਲੱਗਦੈ ਰੋਂਦੇ ਰਹੇ ਓ !
ਗੱਲ੍ਹਾਂ 'ਤੇ ਕੁਝ ਲਸਰ ਜਿਹੀ ਏ ।
ਹੋਂਠ 'ਤੇ ਉਹਦਾ ਨਾਂ ਆਇਆ ਏ,
ਮੂੰਹ ਵਿੱਚ ਖੰਡ ਤੇ ਸ਼ਕਰ ਜਿਹੀ ਏ ।
ਪੈਂਡੇ, ਧੂੜਾਂ, ਠੇਡੇ, ਸੂਲਾਂ,
ਜਿੰਦੜੀ ਦੁਖ ਦਾ ਸਫ਼ਰ ਜਿਹੀ ਏ ।
ਸੁਖ ਦੇ ਨਾਂ 'ਤੇ ਦੁਖ ਮਿਲਦੇ ਨੇ,
ਅਦਲ ਦੀ ਸੂਰਤ, ਜਬਰ ਜਿਹੀ ਏ ।
ਬੰਦੇ ਬਰਫ਼ ਦੇ ਬਾਵੇ ਲੱਗਦੇ,
ਦੁਨੀਆਂ ਉਜੜੀ-ਕਬਰ ਜਿਹੀ ਏ ।
ਸੱਚ ਦੀ ਰਾਹ 'ਤੇ ਯਾਰ 'ਕਮਰ' ਜੀ,
ਖ਼ੌਫ਼ ਦੇ ਜਾਦੂ-ਨਗਰ ਜਿਹੀ ਏ ।
